ଲଡୁଗାଁ : ଋତୁଚକ୍ର ପରିବର୍ତ୍ତନର ତାଳେତାଳେ ବଦଳିଥାଏ ପ୍ରକୃତିର ଚିତ୍ର। ଶରତର ଆଗମନରେ ପାର୍ବଣର ବାର୍ତ୍ତା ନେଇ ଧରା ପୃଷ୍ଠରେ ତା’ର ପସରା ମେଲାଇଥାଏ କାଶତଣ୍ଡି । ହେଲେ କଳାହାଣ୍ଡି ଜିଲ୍ଲା କୋକସରା ଅଞ୍ଚଳରେ ଦେଖିବାକୁ ମିଳିଛି ଏକ ବିରଳ ଦୃଶ୍ୟ। ବଦଳିଛି ଋତୁଚକ୍ର, ତା ସହ ବଦଳି ଯାଇଛି ପ୍ରକୃତିର ନିୟମ। ଶରତ ଋତୁ ଆଗମନର ମାସକ ଆଗରୁ ଧରା ପୃଷ୍ଠକୁ ଓହ୍ଲାଇ ଆସିଛି କାଶତଣ୍ଡି। ପ୍ରକୃତିର ଏଇ ଅମୂଲ୍ୟ ଉପହାର ଏ ଅଞ୍ଚଳର ବିଲମାଳ, ରାସ୍ତାକଡ, ନଈପଠା ଓ ଖାଲୁଅ ଜମିରେ ଦେଖାଯାଏ। ସେ ଯାହା ହେଉନା କାହିଁକି କାଶତଣ୍ଡି ଫୁଲର ସମ୍ଭାର ପ୍ରକୃତି ପ୍ରେମୀଙ୍କୁ ଆକୃଷ୍ଟ କରେ। ପ୍ରକୃତିର କାନଭାସରେ କାଶତଣ୍ଡି ଯେପରି ଏକ ତୂଳୀର ସ୍ପର୍ଶ। ତା’ର ବାସନା ନାହିଁ ସତ ହେଲେ ତା’ର ଶୁଭ୍ରରୂପ ବଦଳାଇ ଦିଏ ତନୁ ମନ। ସତରେ ବାଟୋଇଟିଏ ହଜିଯାଏ ଏହାର କମନୀୟ ସୁଷମା ଭିତରେ। ଏହା ସହିତ ସେଲଫି ନେବାକୁ ସେ ବିବ୍ରତ ହୋଇଉଠେ। କବି ଏହି ଫୁଲକୁ ଦେଖି ବିଭୋର ହୋଇଯାଏ। ତା’ କଲମ ମୁନରୁ ସୁନ୍ଦର କବିତାରାଜି ଝରିପଡେ। କାଶତଣ୍ଡି ଖୁସି ବାଣ୍ଟି ବାଣ୍ଟି ପ୍ରକୃତି କୋଳରେ ଝାଉଁଳି ପଡେ ଏବଂ ଅପେକ୍ଷା କରିଥାଏ ଆଗାମୀ ଶରତକୁ । ସତେ ଯେମିତି ଧରଣୀ ରାଣୀ ଧଳା ରଙ୍ଗର ଚାଦର ଟିଏ ଘୋଡେ଼ଇ ହୋଇଥିବା ଭଳି ମନେହୁଏ । ବୋଧହୁଏ ମାଁ ଙ୍କୁ ସ୍ଵାଗତ କରିବା ପାଇଁ କାଶତଣ୍ଡି ବ୍ୟାକୁଳ ହୋଇ ଉଠିଛି। ହେଲେ ମାଁ ଧରାବତରଣ ହେବା ବେଳକୁ କାଶତଣ୍ଡି ରହିବ କି ନାହିଁ ତାହାକୁ ନେଇ ଏବେ ପ୍ରକୃତି ପ୍ରେମୀ ଚିନ୍ତା ପ୍ରକଟ କରିଛନ୍ତି।
Popular Categories
Previous article
Next article