ଫୁଲବାଣୀ : କନ୍ଧମାଳ ଜିଲ୍ଲା ତିନି ଦିନ ଧରି ଲଗାଣ ବର୍ଷା ଯୋଗୁଁ ଗାଁ ଠାରୁ ସହର ପର୍ଯ୍ୟନ୍ତ ନାହିଁ ନଥିବା ପରିସ୍ଥିତି ସୃଷ୍ଟି ହୋଇଥିବା ବେଳେ ଜିଲ୍ଲାରେ ସଦରମହକୁମା ଫୁଲବାଣୀ ସହରର ଜନଜୀବନକୁ ଅସ୍ତବ୍ୟସ୍ତ କରି ପକାଇଛି। ଅନେକ ତଳିଆ ଅଞ୍ଚଳରେ ପାଣି ପଶିବା ସହ କଚ୍ଚା ଘର ଭାଙ୍ଗିଛି। ନାରାୟଣୀ ମନ୍ଦିର ନିକଟ ପାହାଡ ଉପରେ ଥିବା ତ୍ରିଦେବ ନଗର ବାସିନ୍ଦାଙ୍କୁ ଜିଲ୍ଲା ସଂସ୍କୃତି ଭବନ ଅସ୍ଥାୟୀ ଶିବିରକୁ ସ୍ଥାନାନ୍ତର କରାଯାଇଛି। ଏହି ସ୍ଥାନରେ ଗତ ଦିନରେ ଭୂସ୍ଖଳନ ଯୋଗୁଁ କାନ୍ଥ ପଡିଯାଇ ଦୁଇ ଜଣଙ୍କ ମୃତ୍ୟୁ ହୋଇଥିଲା। ତେଣୁ ସତର୍କତା ମୂଳକ ପଦକ୍ଷେପ ଭାବେ ଏହି ସ୍ଥାନରୁ ଲୋକଙ୍କୁ ସ୍ଥାନାନ୍ତର କରାଯାଇଛି। ବର୍ତ୍ତମାନ ଏହି ଶିବିରରେ ୯୨ ଜଣ ଆଶ୍ରୟ ନେଇଥିବା ବେଳେ ସେମାନଙ୍କୁ ରନ୍ଧା ଖାଦ୍ୟ ଯୋଗାଇ ଦିଆ ଯାଉଥିବା ପ୍ରକାଶ କରିଛନ୍ତି ପୌର ନିର୍ବାହୀ ଅଧିକାରୀ ଅଜିତ କୁମାର ପଟ୍ଟନାୟକ। ପୌରାଧ୍ୟକ୍ଷା ସ୍ମିତାରାଣୀ ମହାନ୍ତି, ଉପଜିଲ୍ଲାପାଳ ଶେଷ ଦେବ ମିଶ୍ର ଏବଂ ଅନ୍ୟ ଅଧିକାରୀ ମନେ ଅସ୍ଥାୟୀ ଶିବିର ପରିଦର୍ଶନ କରି ଶିବିରାର୍ଥୀ ମାନଙ୍କ ହାଲଚାଲ ପଚାରିଛନ୍ତି । ବର୍ଷା କମିଲେ ସେମାନେ ନିଜ ନିଜ ଘରକୁ ଫେରିବେ ବୋଲି ସୂଚନା ଦିଆଯାଇଛି।
Comments are closed.