କଲ୍ୟାଣସିଂହପୁର: ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ବୁଡ଼ାଗୁଡା ପଞ୍ଚାୟତର ବଳଦିଆଠାରେ ବୁଧବାର ଘଟିଛି ଏକ ଦୁର୍ଘଟଣା। ଏକ ବାଇକ ଭାରସାମ୍ୟ ହରାଇ ଗଛରେ ପିଟିହେବା ଫଳରେ ଜଣଙ୍କ ମୃତ୍ୟୁ ଘଟିବାସହ ଦୁଇ ଜଣ ଗୁରୁତର ଆହତ ହୋଇଛନ୍ତି। ମୃତ ଯୁବକ ଜଣକ ହେଲେ ଟିକିରାପଡା ଗ୍ରାମର ସ୍ୟାମ୍ବା କାଡ୍ରାକାଙ୍କ ପୁଅ ପତି କାଡ୍ରାକା(୨୭)।
ସୂଚନା ଅନୁସାରେ, ସୁନାଖଣ୍ଡି ପଞ୍ଚାୟତର ଟିକିରାପଡା ଗ୍ରାମର ତିନି ଜଣ ଯୁବକ ଏକ ବାଇକରେ ସେରିଗୁମ୍ମା ଗ୍ରାମରେ ଥିବା ସମ୍ପର୍କୀୟ ଘରକୁ ଯାଇ ମଙ୍ଗଳବାର ସନ୍ଧ୍ୟାରେ ଫେରୁଥିଲେ। ଏହି ସମୟରେ ବଳଦିଆ ଗ୍ରାମ ନିକଟରେ ଭାରସାମ୍ୟ ହରାଇ ବାଇକଟି ଗଛରେ ପିଟି ହୋଇଯାଇଥିଲା। ସ୍ଥାନୀୟ ଲୋକେ ରୋଗିବୁହା ଯାନକୁ ଯୋଗାଯୋଗ କରି ନିକଟସ୍ଥ ସିକରପାଇ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର ପ୍ରାଥମିକ ଚିକିତ୍ସା କରି ମୁଣ୍ଡ ଫାଠି ଗୁରୁତର ଥିବା ପତି କାଡ୍ରାକାଙ୍କୁ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ଦୁଇ ସାଙ୍ଗ ମହେଶ୍ୱର ହୁଈକା ଓ ମଧୁ ହୁଈକା ଗୁରୁତର ଅବସ୍ଥାରେ ଚିକିତ୍ସିତ ହେଉଥିବା ଜଣାପଡ଼ିଛି। ଖବର ପାଇ କଲ୍ୟାଣସିଂହପୁର ପୁଲିସ ଜିଲା ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ମୃତଦେହ ଜବତ କରି ଅପମୃତ୍ୟୁ ମାମଲା ରୁଜୁ କରିବା ପରେ ଶବ ବ୍ୟବଚ୍ଛେଦ କରାଇ ପରିବାରକୁ ହସ୍ତାନ୍ତର କରିଛି।
Comments are closed.