ପିପିଲି : ସୋମବାର ଅପରାହ୍ନରେ ପିପିଲି ଓ ଏହାର ଆଖପାଖ ଅଞ୍ଚଳରେ ପ୍ରବଳ ମାତ୍ରାରେ ଘଡଘଡି ସହ ବର୍ଷା ହୋଇଥିବା ବେଳେ ବଜ୍ରାପାତରେ ଜଣେ ମହିଳାଙ୍କ ମୃତ୍ୟୁ ଘଟିଛି । ମୃତ ମହିଳା ଜଣକ ହେଲେ ଦାଣ୍ଡମୁକୁନ୍ଦପୁର ପଞ୍ଚାୟତ ଅନ୍ତର୍ଗତ ରଇତପାଟଣା ଗ୍ରାମର ପଠାଣୀ ବେହେରାଙ୍କ ପତ୍ନୀ ବୁଧି ବେହେରା (୫୫) ବୋଲି ସୂଚନା ମିଳିଛି । ଅପରାହ୍ନ ପ୍ରାୟ ୩ଟା ସମୟରେ ସେ ନିଜ ଘର ସମ୍ମୁଖରେ ବଜ୍ରାପାତରେ ଟଳି ପଡିଥିଲେ। ବେହୋସ ଅବସ୍ଥାରେ ପରିବାର ଲୋକେ ତାଙ୍କୁ ପିପିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ପିପିଲି ପୁଲିସ ମୃତଦେହକୁ ଜବତ କରି ଘଟଣାର ତଦନ୍ତ ଚଳାଇଥିବା ବେଳେ ମଙ୍ଗଳବାର ବ୍ୟବଚ୍ଛେଦ ପାଇଁ ପୁରୀ ପଠାଯିବ ବୋଲି ସୂଚନା ମିଳିଛି।
ସେହିପରି ନିକଟବର୍ତ୍ତି କୁଳଶିଖରପାଟଣା ଗ୍ରାମର ବିନୋଦିନି ବେହେରା ନାମ୍ନି ମହିଳା ନିଜ ଘରେ ରୋଷେଇ କରୁଥିବା ସମୟରେ ବଜ୍ରାପାତରେ ବେହୋସ ହୋଇପଡିଥିଲେ। ପରିବାର ଲୋକେ ତାଙ୍କୁ ଚିକିତ୍ସା ଲାଗି ପିପିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ସେ ସୁସ୍ଥ ହୋଇ ରାତି ସାଢେ ୮ଟାରେ ଘରକୁ ଫେରିଥିବା ସୂଚନା ମିଳିଛି।
ବଜ୍ରପାତରେ ମହିଳା ମୃତ
Popular Categories
Previous article
Next article