ଫୁଲବାଣୀ : କନ୍ଧମାଳ ଜିଲା ଫିରିଙ୍ଗିଆ ବ୍ଲକରେ ବାରମ୍ବାର ଗଞ୍ଜେଇକୁ ନେଇ ଚଢ଼ାଉ ଜାରି ରହିଥିବା ବେଳେ ପୁଣି ଫିରିଙ୍ଗିଆ ପୁଲିସ ଶୁକ୍ରବାର ବ୍ଲକର କାଶିନୀପଦର ପଞ୍ଚାୟତ କୁଟୁଣିପାଦର ଗାଁ ନିକଟ ଜଙ୍ଗଲର ଏକ କୁଡ଼ିଆରୁ ୩ କ୍ବିଣ୍ଟାଲରୁ ଊର୍ଦ୍ଧ୍ବ ଗଞ୍ଜେଇ ଜବତ କରିଛି। ଘଟଣା ସ୍ଥଳରୁ ଗଞ୍ଜେଇ ଛାଡ଼ି ମାଫିଆମାନେ ଫେରାର ମାରିଥିବା ସୂଚନା ମିଳିଛି।
ସୂଚନା ଅନୁସାରେ, କୁଟୁନି ପଦର ଜଙ୍ଗଲରେ ଗଞ୍ଜେଇ ରଖି ବାହାରକୁ ପଠାଇବାକୁ ଯୋଜନା ଚାଲିଥିବା ଫିରିଙ୍ଗିଆ ପୁଲିସକୁ ସୂଚନା ମିଳିଥିଲା। ଏହାକୁ ଗୁରୁତର ସହ ନେଇ ଫିରିଙ୍ଗିଆ ଥାନା ଅଧିକାରୀ ତପନ କୁମାର ନାହାକ ଏବଂ ପୁଲିସ ଟିମ୍ କୁଟୁନିପଦର ନିକଟ ଜଙ୍ଗଲରେ ଚଢ଼ାଉ କରିଥିଲେ। ତେବେ ପୁଲିସ ଅସୁଥିବା ଦେଖି ଗଞ୍ଜେଇ ଭର୍ତ୍ତି ବାକ୍ସକୁ ଜଙ୍ଗଲର ଏକ କୁଡ଼ିଆରେ ଛାଡ଼ି ମାଫିଆମାନେ ଘଟଣା ସ୍ଥଳରୁ ଫେରାର ମାରିଥିଲେ। ପରେ ପୁଲିସ ଟିମ୍ ଘଟଣା ସ୍ଥଳରୁ ଗଞ୍ଜେଇ ଭର୍ତ୍ତି ବାକ୍ସ ଜବତ କରିଥିବା ବେଳେ ଥାନାକୁ ଆଣି ଓଜନ କଲା ପରେ ୩ କ୍ବିଣ୍ଟାଲ ୫୨ କେଜି ୮୦୦ଗ୍ରାମ ଗଞ୍ଜେଇ ହୋଇଥିଲା। ଅନ୍ୟପଟେ ଗଞ୍ଜେଇକୁ ନେଇ ଫିରିଙ୍ଗିଆ ଥାନାରେ ୧୦୪/୨୩ ରେ ଏକ ମାମଲା ରୁଜୁ କରିବା ସହ ଫେରାର ୫ ଅଭିଯୁକ୍ତକୁ ଧରିବା ପାଇଁ ପ୍ରୟାସ ଜାରି ରଖିଥିବା ଫିରିଙ୍ଗିଆ ଥାନା ଅଧିକାରୀ ତପନ କୁମାର ନାହାକ ସୂଚନା ଦେଇଛନ୍ତି।
Comments are closed.