ଧାମରା: ଧାମରା ନିକଟସ୍ଥ ଚନ୍ଦନୀପାଳଠାରେ ଥିବା ନିଷ୍କାସନ ନାଳରୁ ଅବରୋଧକାରୀଙ୍କୁ ହଟାଇବା ପାଇଁ ଅମର ନଗର ବାସିନ୍ଦା ସୋମବାର ଏହି ବାବଦରେ ଚାନ୍ଦବାଲି ତହସିଲଦାରଙ୍କୁ ଏକ ଦାବୀପତ୍ର ପ୍ରଦାନ କରିଛନ୍ତି। ପ୍ରାପ୍ତ ଖବରରୁ ଜଣାଯାଇଛି, ଧାମରା ରାଜସ୍ୱ ଅଧିକାରୀଙ୍କ ଅଧିନରେ ଥିବା ଅମର ନଗର ଏବଂ ରବୀନ୍ଦ୍ର ନଗର ଗ୍ରାମର ଥିବା ଜଳ ନିଷ୍କାସନ ନାଳକୁ ବହୁ ଅବରୋଧକାରୀ ଅବରୋଧ କରି ରଖିଥିବାରୁ ୨ଗ୍ରାମରୁ ଅବ୍ୟବହୃତ ଜଳ ଏହି ନିଷ୍କାସନ ନାଳ ଦେଇ ସମୁଦ୍ରରେ ପହଞ୍ଚି ପାରୁନାହିଁ। ଫଳରେ ଟିକିଏ ବର୍ଷାରେ ଏହି ଅଂଚଳ ସଂପୂର୍ଣ୍ଣ ଜଳମଗ୍ନ ହୋଇଯାଉଛି। ଆଜି ଭଳି ଦିନରେ ଅମର ନଗର ଏବଂ ରବୀନ୍ଦ୍ର ନଗରର ବହୁ ବିଦ୍ୟାଳୟ ଏବଂ ଅଙ୍ଗନବାଡ଼ିର କୋମଳମତି ପିଲାମାନେ ଶିକ୍ଷାଦାନ ପାଇଁ ଯାଇ ନପାରି ଘରେ ବସି ରହିବା ସହ ଏହି ଅଂଚଳର ସାଧାରଣ ଜନତା ମଧ୍ୟ ରାସ୍ତା ଘାଟରେ ଯାତାୟତ କରି ପାରୁୁନାହାନ୍ତି।
ଖାତା ନଂ-୧୨୧ ଓ ପ୍ଲଟ ନଂ ୩୧୭, ୧୮୮, ୨୧୦ ଏବଂ ୩୧୫ ଦେଇ ଯାଇଥିବା ନୟନଜୋରୀକୁ ଜୋର ଜବରଦସ୍ତ ନିଜ କବଜାକୁ ନେଇ ଦଖଲ କରି ଆସୁଛନ୍ତି। ଏମିତିକି ବର୍ଷା ଦିନରେ ଅମର ନଗର ଓ ରବୀନ୍ଦ୍ର ନଗରର ସାଧାରଣ ଜନତା ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପାଇଁ ଘରୁ ମଧ୍ୟ ବାହାରିବା ସମ୍ଭବ ହୋଇ ପାରୁନାହିଁ। ଏହି ପାଣି ଜମି ରହିବା ଫଳରେ ବହୁ ସମୟରେ ମହାମାରୀ ରୋଗରେ ସମସ୍ତ ଶିଶୁ ଏବଂ ଜନସାଧାରଣ ଆକ୍ରାନ୍ତ ହେଉଥିବା ଦୃଷ୍ଟାନ୍ତ ମଧ୍ୟ ଅଛି। ତୁରନ୍ତ ଏହି ନୟନଜୋରୀକୁ ଜବରଦଖଲ କାରୀଙ୍କ କବଳରୁ ହଟାଇବା ପାଇଁ ଶତାଧିକା ମହିଳା ଏବଂ ପୁରୁଷ ଆସି ଚାନ୍ଦବାଲି ତହସିଲଦାରଙ୍କୁ ଭେଟି ରାଜ୍ୟ ମୁଖ୍ୟମନ୍ତ୍ରୀ, ୫ଟି ଶଚିବ, ମୁଖ୍ୟ ଶାସନ ସଚିବ ଏବଂ ଭଦ୍ରକ ଜିଲ୍ଲାପାଳଙ୍କ ଉଦ୍ୱେଶରେ ଏକ ଦାବୀପତ୍ର ପ୍ରଦାନ କରିବା ସହ ତୁରନ୍ତ ଅବରୋଧକାରୀମାନଙ୍କୁ ନୟନଜୋରୀ ଏବଂ ସରକାରୀ ଜମିରୁ ହଟାଇବାକୁ ଅନୁରୋଧ କରିଛନ୍ତି। ଆଗାମୀ ୧୫ ଦିନ ମଧ୍ୟରେ ଏହି ଜବରଦଖଲକାରୀଙ୍କୁ ହଟା ନଗଲେ ଅମରନଗର ଗ୍ରାମବାସୀ ଆଇନକୁ ହାତକୁ ନେବା ସହ ଆନ୍ଦୋଳନକୁ ଓହ୍ଲାଇବେ ବୋଲି ମଧ୍ୟ ଚେତାବନୀ ଦେଇଛନ୍ତି। ଆଜି ଏହି ଦାବୀପତ୍ର ପ୍ରଦାନ ସମୟରେ ନାରାୟଣ ଚନ୍ଦ୍ର ମହତା, ବାବାଜୀ ଦାସ, ଅନିଲ କୁମାର ଦାସ, ବିମଲ ପାତ୍ର, ସୁଶାନ୍ତ ଗିରି, ଭବେଶ ସିଂଙ୍କ ସମେତ ଶତାଧିକ ମହିଳା ଉପସ୍ଥିତ ଥିଲେ।
Comments are closed.