ଦେବଗଡ଼: ଦେବଗଡ଼ ବନଖଣ୍ଡ ତଥା ବାରକୋଟ ବନାଞ୍ଚଳ କଲା ଫରେଷ୍ଟ ସେକ୍ସନ ଅନ୍ତର୍ଗତ ହରେକୃଷ୍ଣପୁର ଗ୍ରାମରେ ସୋମବାର ଭୋର ସମୟରେ ଜଙ୍ଗଲୀ ହାତୀ ଆକ୍ରମଣରେ ଜଣେ ଶତାୟୁ ବୃଦ୍ଧଙ୍କ ମୃତ୍ୟୁ ଘଟିଛି।
ମିଳିଥିବା ସୂଚନା ଅନୁଯାୟୀ, ଅନ୍ୟ ଦିନମାନଙ୍କ ଭଳି ଆଜି ଭୋର ପ୍ରାୟ ୫ଟା ସମୟରେ ମଧ୍ୟ ଗ୍ରାମର ରେଙ୍ଗଟୁ ମହାନ୍ତ(୧୦୩) ଶୌଚ ପାଇଁ ନିକଟସ୍ଥ ବ୍ରାହ୍ମଣୀ ନଦୀ କୂଳକୁ ଯାଇଥଲେ। ଏହି ସମୟରେ ୧୨ ଟିକିଆ ହାତୀ ପଲ ନଦୀ କୂଳ ଦେଇ ଯାଉଥିବା ବେଳେ ରେଙ୍ଗଟୁ ସେମାନଙ୍କ ହାବୁଡରେ ପଡ଼ିଥିଲେ। ସେହି ଦଳରୁ ଏକ ଦନ୍ତା ହାତୀ ତାଙ୍କୁ ଉପରକୁ ଟେକି କଚାଡି ଦେବାସହ ଦାନ୍ତରେ ଭୁଷି ଦେଇଥିଲା। ଫଳରେ ରେଙ୍ଗଟୁଙ୍କ ଛାତି ସମେତ ଶରୀରର ବିଭନ୍ନ ଅଂଶରେ କ୍ଷତ ସୃଷ୍ଟି ହେବା ସହ ସେ ଗୁରୁତର ଆହତ ହୋଇଥିଲେ। ନିକଟରେ ଟୋଲ ଗୋଟାଉଥିବା ଲୋକେ ହୋହାଲ୍ଲା କରିବାରୁ ହାତୀ ପଲ ସେଠାରୁ ଚାଲିଯାଇଥିବା ବେଳେ ଗୁରୁତର ଅବସ୍ଥାରେ ରେଙ୍ଗଟୁଙ୍କୁ ଉଦ୍ଧାର କରି ବାରକୋଟ ଡାକ୍ତରଖାନାକୁ ଅଣାଯାଇଥିଲା। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ସୂଚନା ପାଇ କଲା ଫରେଷ୍ଟର ପ୍ରୀତମ ପ୍ରଧାନ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିବା ଜଣାପଡ଼ିଛି।
Comments are closed.