ଓ୍ୱାଶିଂଟନ- ୨୦୧୭ ମସିହାରେ ପୃଥିବୀ ନିକଟ ଦେଇ ଏକ ଭିନ୍ନ ଆକାରର ଜିନିଷ ମହାକାଶରେ ଦେଖାଯାଇଥିଲା । ବୈଜ୍ଞାନିକମାନେ ପ୍ରଥମ ଥର ପାଇଁ ଏପରି ଜିନିଷ ଦେଖି ଏହାକୁ ଏଲିଅନ୍ଙ୍କ ଯାନ ହୋଇପାରେ ବୋଲି ଅନୁମାନ କରିଥିଲେ । ପୃଥିବୀ ନିକଟ ଦେଇ ଏହା ଗତି କରିବା ସମୟରେ ଓମୁଆମୁଆ ବିଷୟରେ ଅଧିକ ତଥ୍ୟ ମିଳିଥିଲା । ଏହା ସୌର ମଣ୍ଡଳ ବାହାରୁ ଆସିଥିବା ଭିନ୍ନ ଏକ ଆକାରର ଚଟାଣ ବା ପସ୍ତର ଖଣ୍ଡ ବୋଲି ଜଣା ପଡିଥିଲା । ଏଥିପରେ ବରଫ ଏବଂ ତା ତଳେ ଉଦ୍ଜାନ ବା ହାଇଡ୍ରୋଜେନ୍ ଥିଲା । ସୂର୍ଯ୍ୟଙ୍କ ନିକଟବର୍ତ୍ତୀ ହେବାରୁ ଏଥିରୁ ବରଫ ତରଳି ଉଦ୍ଜାନ୍ ବାହାରକୁ ବାହାରିଥିଲା ।
ଏହି କାରଣରୁ ଓମୁଆମୁଆର ଗତି ବୃଦ୍ଧି ପାଇଥିଲା । ଧୀରେ ଧୀରେ ଏହା ପୃଥିବୀଠାରୁ ଦୂରେଇଯିବା ସହ ଗତି ମଧ୍ୟ ଧୀର ହୋଇଥିଲା । ଜର୍ଣ୍ଣାଲ୍ ନେଚରରେ ଗତ ବୁଧବାରରେ ଏ ନେଇ ଏକ ଗବେଷଣାମୂଳକ ତଥ୍ୟ ପ୍ରକାଶ ପାଇଛି ।
ଏହା ଏଲିଅନ୍ଙ୍କ ଯାନ ହୋଇପାରେ ବୋଲି ଯେଉଁ ଅନୁମାନ କରାଯାଉଥିଲା ତାହା ନୁହେଁ ବୋଲି ଏଥିରେ କୁହାଯାଇଛି । କାଲିଫର୍ଣ୍ଣିଆ ବିଶ୍ୱବିଦ୍ୟାଳୟର ଗବେଷକମାନେ ଏଥିରୁ ଉଦ୍ଜାନ ବାହାରିବା ଯୋଗୁଁ ଗତିରେ ଭିନ୍ନତା ପରିଲକ୍ଷିତ ହୋଇଥିବା କଥା ପ୍ରକାଶ କରିଛନ୍ତି ।
୨୦୧୭ ମସିହାରେ ପ୍ରଥମ କରି ଓମୁଆମୁଆକୁ ଠାବ କରାଯାଇଥିଲା । ଏହା ୪୦୦ ମିଟର ଲମ୍ବା ୪୦ ମିଟର ଚୌଡା ଥିଲା । ପ୍ରତି ଘଣ୍ଟାରେ ଏହା ତିନିଲକ୍ଷ୧୪ ହଜାର କିଲୋମିଟର ବେଗରେ ଗତି କରୁଥିଲା ।
