ରେଙ୍ଗାଲି: ରେଙ୍ଗାଲି ସ୍ଥିତ ବନାଞ୍ଚଳ କାର୍ଯ୍ୟାଳୟରେ ଗୁରୁବାର ଜଙ୍ଗଲ ନିଆଁ ନିର୍ବାପନ ନିମନ୍ତେ ଏକ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ବନାଞ୍ଚଳ ଅଧିକାରୀ ପୃଥ୍ୱୀରାଜ ବେହେରାଙ୍କ ସଭାପତିତ୍ୱରେ ଅନୁଷ୍ଠିତ ଏହି ଶିବିରରେ ରେଙ୍ଗାଲି ବ୍ଳକ୍ ଅଧ୍ୟକ୍ଷ ସତ୍ୟନାରାୟଣ ଅଗ୍ରଓ୍ବାଲା, ରେଙ୍ଗାଲି ତହସିଲଦାର ବେର୍ସିଆସ୍ ଡୁଙ୍ଗ୍ଡୁଙ୍ଗ୍, ଓଡ଼ିଶା ଆଦର୍ଶ ବିଦ୍ୟାଳୟର ଅଧ୍ୟକ୍ଷ ରମଣିକାନ୍ତ ସାହୁ, ସ୍ୱେଚ୍ଛାସେବୀ ଅନୁଷ୍ଠାନ ସ୍ୱାଧିନ ଏକତା ସଙ୍ଗଠନର ସଭାପତି ରାଜିବ କୁମାର ମିଶ୍ର ଅତିଥି ରୂପେ ଯୋଗଦେଇ ବକ୍ତବ୍ୟ ରଖିଥିଲେ। ଜଙ୍ଗଲରେ ନିଆଁ ଲାଗିବାର କାରଣ ଏବଂ ଏଥିଯୋଗୁଁ ପରିବେଶ ଓ ଜୀବ ଜଗତ ତଥା ଜଳବାୟୁ ଉପରେ ପଡୁଥିବା ଭୟଙ୍କର କୁପ୍ରଭାବ ଉପରେ ବକ୍ତାମାନେ ଆଲୋକପାତ କରି ଜଙ୍ଗଲକୁ ନିଆଁ କବଳରୁ ରକ୍ଷା କରିବାକୁ ସମସ୍ତେ ସଙ୍କଳ୍ପ ନେବାକୁ ଆହ୍ୱାନ ଦେଇଥିଲେ। ପ୍ରାରମ୍ଭରେ ଟିମ୍ ଲିଡର୍ ଗୋକୁଳ ମହାରଣା ପ୍ରାରମ୍ଭିକ ସୂଚନା ପ୍ରଦାନ କରିଥିଲେ। ସଭାପତି ତଥା ବନାଞ୍ଚଳ ଅଧିକାରୀ ପୃଥ୍ୱୀରାଜ ବେହେରା ସଚେତନ ଶିବିର ଆୟୋଜନର ଉଦ୍ଦେଶ୍ୟ ଏବଂ ଲକ୍ଷ୍ୟ ଉପରେ ଆଲୋକପାତ କରି ଜଙ୍ଗଲରେ ନିଆଁ ନ ଲଗାଇବାକୁ ସମସ୍ତଙ୍କ ମଧ୍ୟରେ ସଚେତନତା ସୃଷ୍ଟି କରିବା ଉପରେ ଗୁରୁତ୍ୱାରୋପ କରିଥିଲେ।
Comments are closed.