ଡେସ୍କ: ଦେଶରେ ଚାଲିଥିବା ସ୍ମାର୍ଟ ସିଟି ଯୋଜନାରେ ଏ ପର୍ଯ୍ୟନ୍ତ ମୋଟ ଆବଣ୍ଟିତ ଅର୍ଥର ୮୬ ପ୍ରତିଶତ ବିନିଯୋଗ ହୋଇଛି। ଆଜି ଲୋକସଭାରେ ଏକ ଲିଖିତ ଉତ୍ତରରେ ଗୃହ ନିର୍ମାଣ ଓ ସହରାଂଚଳ ବ୍ୟାପାର ରାଷ୍ଟ୍ରମନ୍ତ୍ରୀ କୌଶଳ କିଶୋର କହିଛନ୍ତି ଯେ ସ୍ମାର୍ଟ ସିଟି ଲାଗି ଉଦ୍ଦିଷ୍ଟ ପ୍ରକଳ୍ପଗୁଡିକ ମଧ୍ୟରୁ ଚଳିତ ବର୍ଷ ମାର୍ଚ୍ଚ ୩ ସୁଦ୍ଧା ୬୯ ପ୍ରତିଶତ ପ୍ରକଳ୍ପ କାର୍ଯ୍ୟ ଶେଷ ହୋଇଛି। ସେ ଗୃହକୁ ଜଣାଇଛନ୍ତି ଯେ, ସ୍ମାର୍ଟ ସିଟି ଯୋଜନା ଅଧୀନରେ ୭ ହଜାର ୭୯୯ଟି ପ୍ରକଳ୍ପ ମଧ୍ୟରୁ ୫ ହଜାର ୩୯୯ଟି ପ୍ରକଳ୍ପ କାର୍ଯ୍ୟ ଶେଷ ହୋଇଛି।
ମନ୍ତ୍ରୀ କହିଛନ୍ତି, ସ୍ମାର୍ଟ ସିଟି ଯୋଜନାରେ ଉଭୟ କେନ୍ଦ୍ର ଓ ରାଜ୍ୟ ସରକାରଗୁଡିକ ୬୯ ହଜାର ୬୮୫ କୋଟି ଟଙ୍କା ବ୍ୟବବାର୍ଡ କରିଥିବା ବେଳେ ସେଥିମଧ୍ୟରୁ ଏ ପର୍ଯ୍ୟନ୍ତ ୫୯ ହଜାର ୭୯୧ କୋଟି ଟଙ୍କା ଖର୍ଚ୍ଚ ହୋଇଛି। ଏବେ ଏହାର କାର୍ଯ୍ୟକାରିତା ସମୟ ସୀମା ଚଳିତ ବର୍ଷ ଜୁନ ପର୍ଯ୍ୟନ୍ତ ବୃଦ୍ଧି କରାଯାଇଛି। ୨୦୧୫ ମସିହା ଜୁନ ୨୫ରେ ଆରମ୍ଭ ହୋଇଥିବା ସ୍ମାର୍ଟ ସିଟି ଯୋଜନାରେ ୧୦୦ଟି ସହରକୁ ଏହି ତାଲିକାଭୁକ୍ତ କରାଯାଇଛି।
