ପିପିଲି : ପୁରୀ କୃଷି ବିଜ୍ଞାନ କେନ୍ଦ୍ର ଆନୁକୂଲ୍ୟରେ ସ୍ଥାନୀୟ ଦାଣ୍ଡମୁକୁନ୍ଦପୁର ସ୍ଥିତ କଳିଙ୍ଗ ଛତୁ ଉଦ୍ୟୋଗଠାରେ ଏକ ୪ଦିନିଆ ଛତୁମଞ୍ଜି ଉତ୍ପାଦନ ସଂପର୍କିତ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି । ଏଥିରେ ଜିଲାର ବିଭିନ୍ନ ବ୍ଲକର ୧୦ଜଣ ମହିଳା ଚାଷୀଙ୍କ ସମେତ ୨୦ଜଣ ଅଗ୍ରଣୀ ଛତୁଚାଷୀ ଯୋଗଦେଇ ଉନ୍ନତ ମାନର ଛତୁ ବିହନ ଉତ୍ପାଦନ କରିବାର ବିଭିନ୍ନ ପ୍ରଣାଳୀ ସଂପର୍କରେ ତାଲିମ ନେଇଥିଲେ । ଛତୁମଞ୍ଜି ପ୍ରସ୍ତୁତ କରିବା ପାଇଁ କାଚ ବୋତଲ ପରିବର୍ତ୍ତେ ଜରିମୁଣିର ବ୍ୟବହାର ଉପରେ ଏହି ଶିବିରରେ ଗୁରୁତ୍ୱ ଦିଆଯାଇଥିଲା ।
ଶିବିରର ଅନ୍ତିମ ଦିବସରେ ପୁରୀ କୃଷି ବିଜ୍ଞାନ କେନ୍ଦ୍ରର ମୁଖ୍ୟ ବୈଜ୍ଞାନିକ ଡ଼ଃ ସଞ୍ଜୟ କୁମାର ମହାନ୍ତି ଯୋଗଦେଇ ପ୍ରଶିକ୍ଷାର୍ଥୀ ମାନଙ୍କୁ ପ୍ରମାଣପତ୍ର ପ୍ରଦାନ କରିଥିଲେ। କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ଡ଼ଃ ସୁମିତ୍ରା ଆଚାର୍ଯ୍ୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପରିଚାଳିତ ଏହି ଶିବିରରେ କଳିଙ୍ଗ ଛତୁ ଉଦ୍ୟୋଗର ପ୍ରତିଷ୍ଠାତା ତଥା ଅଗ୍ରଣୀ ଛତୁଚାଷୀ ସନ୍ତୋଷ କୁମାର ମିଶ୍ର ପ୍ରଶିକ୍ଷଣ ପ୍ରଦାନ କରିଥିଲେ।
Comments are closed.