ମଧୁମେହ ରୋଗରେ ପାଦର ବିଶେଷ ଯତ୍ନ ନେବାକୁ ହୋଇଥାଏ। କାରଣ, ଏହା ଉପରେ ଶରୀରର ସମଗ୍ର ଭାର ରହିଥିବା ସହ ଏଥିରେ କ୍ଷତ ହେବାର ଆଶଙ୍କା ଅଧିକ। ବର୍ଷା ଏବଂ ଶୀତଦିନେ ମଧୁମେହ ରୋଗୀ ପାଦର ଅଧିକ ଯତ୍ନ ନେବା ଉଚିତ। ତେଣୁ ରକ୍ତଶର୍କରା ନିୟନ୍ତ୍ରଣରେ ରଖିବା ସହ ଏଭଳି କେତେକ ଦିଗ ପ୍ରତି ଧ୍ୟାନ ରଖିବେ-
ଖାଲି ପାଦରେ ଚାଲନ୍ତୁ ନାହିଁ।
ପାଦରେ କୌଣସି ଫୋଟକା ହେବା, କ୍ଷତ ହେବା, ରକ୍ତ ବାହାରିବା, କୌଣସି ପ୍ରକାର ଦୁର୍ଗନ୍ଧ ହେବା, ପାଦର ଚାପ ପଡୁଥିବା ବିନ୍ଦୁଗୁଡିକରେ କୌଣସି ଜଳାପୋଡା ହେବା କିମ୍ବା ପାଦ ଫୁଲିଥିବା ସମ୍ପର୍କରେ ପ୍ରତିଦିନ ଦୃଷ୍ଟି ଦିଅନ୍ତୁ।
ଜୋତା ବା ଚପଲ ଠିକ୍ ହେଉନଥିଲେ ପିନ୍ଧନ୍ତୁ ନାହିଁ। ଢିଲା ଇଲାଷ୍ଟିକ୍ ଥିବା ମୋଜା ପିନ୍ଧିବା ସହିତ ହିଁ ଜୋତା ପିନ୍ଧନ୍ତୁ। ସକାଳ ସମୟରେ ନଯାଇ ସନ୍ଧ୍ୟା ବେଳେ ଜୋତା କିଣନ୍ତୁ। ଏହା ପାଦର ସଠିକ୍ ମାପ କରାଇଥାଏ। ପିନ୍ଧିବା ପୂର୍ବରୁ ଜୋତା ଭିତର ସଫା କରିବାକୁ ଭୁଲନ୍ତୁ ନାହିଁ ।
ଗୋଡ କିମ୍ବା ପାଦରେ କୌଣସି ପ୍ରକାର ଥଣ୍ଡା କି ଗରମ ସେକ ଦେବା, ବୈଦ୍ୟୁତିକ ହିଟିଂ ପ୍ୟାଡ୍ ବ୍ୟବହାର କରିବା ତଥା କୁଣ୍ଡେଇ ହେଲେ ଡାକ୍ତରଙ୍କ ବିନା ପରାମର୍ଶରେ କୌଣସି ମଲମ ଲଗାଇବାକୁ ମନା କରାଯାଇଛି।
ଭଲ ନଖକଟାରେ ନିୟମିତ ବ୍ୟବଧାନରେ ନଖ କାଟି ସଫା କରନ୍ତୁ।
ପାଦରେ କୌଣସି କ୍ଷତ କିମ୍ବା ଅେସ୍ତ୍ରାପଚାର ହୋଇଥିଲେ ଓଜନିଆ ଜିନିଷ ଧରି ଚାଲିବା ମନା।
ଭ୍ରମଣ କରୁଥିବା ବେଳେ ପାଦରୁ ଚପଲ ବା ଜୋତା ବାହାର କରନ୍ତୁ ନାହିଁ। କୌଣସି ଗରମ ସ୍ଥାନରେ ବା ଗରମ ପାଣିରେ ପାଦ ରଖିବା ତଥା ବହୁସମୟ ପର୍ଯ୍ୟନ୍ତ ଗୋଡ ଉପରେ ଗୋଡ ଛନ୍ଦି ବସିବା ମଧ୍ୟ ଅନୁଚିତ।
ପାଦରେ କୌଣସି ବିଣ୍ଡି ହୋଇଥିଲେ ଏହାକୁ ଆପେ ବ୍ଲେଡ କିମ୍ବା ଛୁରୀରେ କାଟିବା ବିପଜ୍ଜନକ ହୋଇପାରେ।
ଦିନକୁ ଦୁଇଥର ସାବୁନ୍ ଏବଂ ପାଣିରେ ପାଦ ଧୋଇ ସଫା କରନ୍ତୁ ଏବଂ ଏହାକୁ ଭଲଭାବେ ଶୁଖିବାକୁ ଦେବା ସହ ମଏଶ୍ଚରାଇଜର ଲଗାଇବା ଉଚିତ।
ଧୂମପାନ କିମ୍ବା ତମାଖୁ ସେବନଠାରୁ ଦୂରେଇ ରହନ୍ତୁ।
