ମୁମ୍ବଇ : ଏଠାରେ ଚାଲିଥିବା ତ୍ରିରାଷ୍ଟ୍ରୀୟ ମହିଳା ଟ୍ୱେଣ୍ଟି-୨୦ ଟୁର୍ଣ୍ଣାମେଣ୍ଟରେ ଆୟୋଜକ ଭାରତୀୟ ଦଳର ନୈରାଶ୍ୟଜନକ ପ୍ରଦର୍ଶନ ଅବ୍ୟାହତ ରଖିଛି। ଲିଗ୍ ପର୍ଯ୍ୟାୟରେ କ୍ରମାଗତ ୩ୟ ପରାଜୟ ଭୋଗିବା ପରେ ଭାରତର ଫାଇନାଲ ଖେଳିବା ଆଶା ମଉଳିଯାଇଛି। ସୋମବାର ଖେଳା ଯାଇଥିବା ଟୁର୍ଣ୍ଣାମେଣ୍ଟର ୪ର୍ଥ ଲିଗ୍ ମ୍ୟାଚ୍ରେ ବେଥ୍ ମୁନି ଓ ଏଲିଜ୍ ଭିଲାନିଙ୍କ ଅର୍ଦ୍ଧଶତକ ବଳରେ ଘରୋଇ ଭାରତକୁ ୩୬ ରନ୍ରେ ଅଷ୍ଟ୍ରେଲିଆ ପରାସ୍ତ କରିଛି। ଭାରତ ପ୍ରଥମେ ବ୍ୟାଟିଂକରି ୫ ୱିକେଟରେ ୧୮୬ ରନ୍ କରିଥିଲା। ପରେ ଓପ୍ନର ଜେମିମା ରଡ୍ରିଗ୍ୱେଜ୍ଙ୍କ ଅର୍ଦ୍ଧଶତକ ସତ୍ତେ୍ୱ ଭାରତ ୨୦ ଓଭର ଶେଷରେ ୫ ୱିକେଟ ହରାଇ ୧୫୦ ରନ୍ କରି ପାରିଥିଲା।
ଏହି ବିଜୟ ଫଳରେ ଅଷ୍ଟ୍ରେଲିଆ ୩ୟ ମ୍ୟାଚ୍ରୁ ୨ୟ ବିଜୟ ହାସଲକରି ଇଂଲଣ୍ଡ ସହ ସମାନ ୪ ପଏଣ୍ଟ ପାଇଛି। ୩ଟି ମ୍ୟାଚ୍ରୁ ଭାରତ ଖାତା ଖୋଲି ପାରିନାହିଁ। ୨୯ରେ ଇଂଲଣ୍ଡ ବିପକ୍ଷରେ ଭାରତ ୪ର୍ଥ ତଥା ଅନ୍ତିମ ଲିଗ୍ ମ୍ୟାଚ୍ ଖେଳିବ। ଏହି ମ୍ୟାଚ୍ରେ ଜିତିଲେ ମଧ୍ୟ ଭାରତ ଫାଇନାଲ ଖେଳିବାର ସମ୍ଭାବନା ନାହିଁ। ଭାରତ ଟସ୍ ଜିତି ଫିଲ୍ଡିଂ ନେବା ପରେ ଅଷ୍ଟ୍ରେଲିଆ ୪ର୍ଥ ଓଭରରେ ୨୯ ରନ୍ରେ ୨ଟି ୱିକେଟ ହରାଇଥିଲା। ଆଲିସା ହିଲି ୯ ଓ ଆସ୍ଲେ ଗାର୍ଡନର ୧୭ ରନ୍କରି ଆଉଟ ହୋଇଥିଲେ। ତେବେ ୩ୟ ୱିକେଟ ପାଇଁ ବେଥ୍ ମୁନି ଓ ଏଲିଜ୍ ଭିଲାନି ୧୧୪ ରନ୍ ଯୋଗକରି ସ୍ଥିତିକୁ ସୁଧାରିଥିଲେ। ମୁନି ଆକ୍ରମଣାତ୍ମକ ବ୍ୟାଟିଂକରି ୮ଟି ଚୌକା ସହ ୭୧ ରନ୍ କରିଥିଲେ। ଭିଲାନି ୪୨ ବଲ୍ରୁ ୧୦ଟି ଚୌକା ସହ ୬୧ ରନ୍ କରିଥିଲେ। ପୂଜା ବସ୍ତ୍ରାକର ୨ଟି ୱିକେଟ ନେଇଥିଲେ। ୧୮୭ ରନ୍ ଲକ୍ଷ୍ୟରେ ଭାରତ ଇନିଂସ ଆରମ୍ଭ କରିବା ପରେ ୨୬ ରନ୍ରେ ୩ଟି ୱିକେଟ ହରାଇଥିଲା। ସ୍ମୃତି ମାନ୍ଧାନା ୩, ମିତାଲି ରାଜ୍ ୦ ଓ ଦୀପ୍ତି ଶର୍ମା ୨ ରନ୍କରି ଆଉଟ ହୋଇ ଯାଇଥିଲେ। ୪ର୍ଥ ୱିକେଟ ପାଇଁ ଜେମିମା ରଡ୍ରିଗ୍ୱେଜ୍ ଓ ଅଧିନାୟିକା ହରମନପ୍ରୀତ କୌର ୫୪ ରନ୍ ଯୋଡ଼ିଥିଲେ। ରଡ୍ରିଗ୍ୱେଜ୍ ୪୧ ବଲ୍ରୁ ୮ଟି ଚୌକା ସହ ୫୦ ରନ୍ କରିଥିଲେ। ହରମନପ୍ରୀତ ୩୦ ବଲ୍ରୁ ଗୋଟିଏ ଛକା ଓ ୨ଟି ଚୌକା ସହ ୩୩ ରନ୍ କରିଥିଲେ। ୯୭ ରନ୍ରେ ଭାରତ ୫ଟି ୱିକେଟ ହରାଇବା ପରେ ଅନୁଜା ପାଟିଲ ଓ ପୂଜା ବସ୍ତ୍ରାକର ୩୭ ବଲ୍ରୁ ୫୩ ରନ୍ ଯୋଗ କରିବାରୁ ଦଳର ସ୍କୋର୍ ଦେଢ଼ଶହ ରନ୍ ସ୍ପର୍ଶ କରି ପାରିଥିଲା। ମେଗାନ୍ ସ୍କଟ୍ ୩ଟି ୱିକେଟ ନେଇଥିଲେ। ମେଗାନ୍ ସ୍କଟ୍ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ।
ଅଷ୍ଟ୍ରେଲିଆଠାରୁ ଭାରତ ପରାସ୍ତ ; ଫାଇନାଲରୁ ବାଦ୍
Popular Categories
Previous article
Next article