ପିପିଲି ବଜାରରେ ଫୁଟିଲା ଗୁଳି; ଜଣେ ଗୁରୁତର

ପିପିଲି: ପୂର୍ବ ବିବାଦକୁ କେନ୍ଦ୍ର କରି ପିପିଲିରେ ସୋମବାର ମଧ୍ୟାହ୍ନ ସାଢେ ୨ଟା ସମୟରେ ଜଣେ ଯୁବକକୁ ଗୁଳି ମାଡ ହୋଇଛି l ନିକଟବର୍ତ୍ତୀ ଉଜାଣିପଡା ଗ୍ରାମର ସାନୁ ଓରଫ ସନାତନ ପ୍ରଧାନ (୩୦)ଙ୍କ ଡାହାଣ ଜଙ୍ଘରେ ଗୁଳି ବାଜିଛି l ଗୁରୁତର ଅବସ୍ଥାରେ ସନାତନଙ୍କୁ ପ୍ରଥମେ ପିପିଲି ମେଡିକାଲରେ ଭର୍ତ୍ତି କରାଯାଇଥିବା ବେଳେ, ପରେ ତାଙ୍କର ଅବସ୍ଥା ଗୁରୁତର ହେବାରୁ ତାଙ୍କୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି l

ଘଟଣାକୁ ନେଇ ପିପିଲିରେ ଦୁଇ ଗୋଷ୍ଠୀ ମଧ୍ୟରେ ପ୍ରବଳ ଉତ୍ତେଜନା ପ୍ରକାଶ ପାଇଛି l ପୁରୀର ଅତିରିକ୍ତ ଏସପି ପୂର୍ଣ୍ଣଚନ୍ଦ୍ର ପ୍ରଧାନ ଘଟଣାସ୍ଥଳରେ ପହଞ୍ଚି ପରିସ୍ଥିତିର ସମୀକ୍ଷା କରିଛନ୍ତି l ପିପିଲି ଏସଡିପିଓ ଦେବଦତ୍ତ ବରାଳ ଓ ଆଇଆଇସି ଅଭିମନ୍ୟୁ ନାୟକ ପ୍ରମୁଖଙ୍କ ନେତୃତ୍ଵରେ ପୁଲିସ ଫୋର୍ସ ବିଭିନ୍ନ ସ୍ଥାନରେ ମୁତୟନ ହୋଇଛନ୍ତି l

ସୂଚନା ଥାଉକି ଗତ କିଛିଦିନ ତଳେ କମେଣ୍ଟମରାକୁ କେନ୍ଦ୍ର କରି ପିପିଲିରେ ଯୁବକକୁ ଆକ୍ରମଣ ହୋଇଥିଲା l ଏହାକୁ ନେଇ ଦୁଇ ଗୋଷ୍ଠୀ ମଧ୍ୟରେ ଉତ୍ତେଜନା ସୃଷ୍ଠି ହୋଇଥିଲା l ଯାହାକି ଆଜି ଉଗ୍ର ରୂପ ଧାରଣ କରିଥିବା ସୂଚନା ମିଳିଛି l