କାମାକ୍ଷାନଗର: କାମାକ୍ଷାନଗର ଉପଖଣ୍ଡ ପରଜଙ୍ଗ ଥାନା ଅନ୍ତର୍ଗତ କନ୍ତୁର ଗ୍ରାମ ଦେଇ ଯାଇଥିବା ରେଙ୍ଗାଳି ବାମ କେନାଲକୁ ସୋମବାର ମାଧ୍ୟାହ୍ନରେ ଗାଧୋଇବାକୁ ଯାଇ ଜଣେ ବୃଦ୍ଧ ନିଖୋଜ ହୋଇଥିବା ଜଣାଯାଇଛି l ବୃଦ୍ଧ ଜଣଙ୍କ ହେଲେ କନ୍ତୁରୁ ଗ୍ରାମର ଉଗୁରୀ ଦେହୁରୀ | ସୂଚନା ଅନୁଯାୟୀ ଉଗୁରୀ ଗାଁ ପାଖ ରେଙ୍ଗାଳି ବାମ କେନାଲ ସୁଇଜ ଗେଟ ତଳକୁ ଗତକାଲି ମଧ୍ୟାହ୍ନରେ ଗାଧୋଇବାକୁ ଯାଇ ଆଉ ଘରକୁ ଫେରି ନଥିଲେ l
ଘରକୁ ନ ଫେରିବାରୁ ପରିବାର ଲୋକ ବହୁ ଖୋଜା ଖୋଜି କରିଥିଲେ ମଧ୍ୟ କୌଣସି ସନ୍ଧାନ ପାଇନଥିଲେ | ପରିବାର ପକ୍ଷରୁ କେନାଲରେ ଭାସିଯାଇଥିବା ସନ୍ଦେହକରି ପରଜଙ୍ଗ ପୁଲିସ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ | ଖବର ପାଇ ଅଗ୍ନିଶମ ବାହିନୀ ଓ ପୁଲିସ ଘଟଣାସ୍ଥଳରେ ପହଞ୍ଚିଥିଲେ l ହେଲେ କେନାଲ ପାଣିର ସ୍ରୋତ ଅତି ପ୍ରଖର ଥିବାରୁ ଖୋଜା ଖୋଜି କରିପାରିନଥିଲେ | ଉପର ମୁଣ୍ଡରେ ଥିବା ଗେଟ ବନ୍ଦ କରିବା ପରେ, ଜଳସ୍ତର କମିଲେ ଖୋଜାଖୋଜି କରାଯିବ ବୋଲି ପୁଲିସ ସୂତ୍ରରୁ ସୂଚନା ମିଳିଛି |
Comments are closed.