ଭାରତର ପୂର୍ବତନ ରାଷ୍ଟ୍ରପତି ଡ.ଏପିଜେ ଅବ୍ଦୁଲ କଲାମଙ୍କର ଏହି ଦୁନିଆ ଛାଡ଼ି ଯିବାର ୩ ବର୍ଷ ହୋଇଯାଇଛି। ତିନି ବର୍ଷ ପୂର୍ବେ ଅର୍ଥାତ୍ ୨୭ ଜୁଲାଇ ୨୦୧୫ରେ କଲାମଙ୍କ ଦେହତ୍ୟାଗ ଦ୍ୱାରା ଏ ଦୁନିଆ ଜଣେ ମହାନ ବ୍ୟକ୍ତିତ୍ୱଙ୍କୁ ହରାଇ ଦେଇଛି ଯାହା ଫେରିପାଇବା ଅସମ୍ଭବ। ସେ ଯିବା ପୂର୍ବରୁ ତାଙ୍କ ଅନ୍ତିମ ଶବ୍ଦରେ ଏକ ଆଦର୍ଶ ନାଗରୀକ ପାଇଁ ପ୍ରଶ୍ନଟିଏ ଛାଡ଼ି ଯାଇଛନ୍ତି। ପ୍ରଶ୍ନଟି ହେଉଛି, ଏହି ଦୁନିଆକୁ ଏହି ଧରିତ୍ରୀକୁ କିପରି ବଞ୍ଚିବା ଯୋଗ୍ୟ କରିହେବ?
କଲାମଙ୍କୁ ଅନ୍ତିମ ସମୟରେ ସାହାରା ଦେଇଥିବା ସୃଜନପାଲ ସିଂହଙ୍କ କହିବା ଅନୁସାରେ, “୨୭ ଜୁଲାଇରେ ଆମେ ସିଲଙ୍ଗ୍ ର ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ମ୍ୟାନେଜ୍ମେଣ୍ଟ(ଆଇଆଇଏମ୍) କୁ ଯାଇଥିଲୁ। ରାସ୍ତାରେ ଗଲାବେଳେ ସେ ସଂସଦକୁ ନେଇ କିଛି କଥା ସେଠାକାର ଛାତ୍ରମାନଙ୍କ ସହ ଆଲୋଚନା କରିବେ ବୋଲି କହୁଥିଲେ। ସେଠାରେ ପହଞ୍ଚିବା ପରେ ଭାଷଣ ଦେବାପାଇଁ ସେ ମଞ୍ଚକୁ ଗଲେ ଓ ମୁଁ ପଛରେ ଠିଆ ହୋଇଥିଲି। ମଞ୍ଚରେ ଦୁଇ ପଦ କଥା କହିଛନ୍ତି କି ନାହିଁ ହଠାତ୍ ପଡ଼ିଗଲେ। ମୁଁ ତାଙ୍କୁ ମୋ ବାହୁରେ ଉଠାଇ ଧରିଥିଲି। ତା’ପରେ ତାଙ୍କୁ ଡାକ୍ତରଖାନା ନେଇଥିଲୁ ହେଲେ ବଞ୍ଚାଇ ପାରି ନଥିଲୁ। ଶେଷ ସମୟରେ ସେ ଗୋଟିଏ ବାକ୍ୟ କହିଥିଲେ ସେ ହେଉଛି, ଧରିତ୍ରୀକୁ ବଞ୍ଚିବା ଯୋଗ୍ୟ କିପରି କରିହେବ”?
କଲାମ ଆଇଆଇଏମ୍ ସିଲଙ୍ଗ୍ ର ଛାତ୍ରମାନଙ୍କୁ ଏକ ‘ସର୍ପ୍ରାଇଜ୍ ଆସାଇନ୍ମେଣ୍ଟ୍’ ଦେବାର ଯୋଜନା କରିଥିଲେ। ଏହି ଆସାଇନ୍ମେଣ୍ଟ୍ରେ ସେ ଛାତ୍ରମାନଙ୍କ ଠାରୁ ଏପରି ନୂଆ ଉପାୟ ଖୋଜିବା ପାଇଁ ଯୋଜନା କରିଥିଲେ ଯଦ୍ୱାରା ସଂସଦରେ ସୁଚାରୁ ରୂପେ ଗୃହକାର୍ଯ୍ୟ ପରିଚାଳନା ପାଇଁ ସୃଷ୍ଟି ହେଉଥିବା ଅଚଳାବସ୍ଥା ଦୂର କରିହେବ।
