ନର୍ଲା: ଗତ କିଛି ଦିନ ହେଲା ରାତି ସମୟରେ ଏକ ଡ୍ରୋନ୍ ନର୍ଲା ବ୍ଲକର କିଛି ଗାଁ ଉପରେ ଉଡୁଥିବାକୁ ନେଇ ଲୋକେ ଆତଙ୍କିତ ହେବା ସହ ଅଭିଯୋଗ ମଧ୍ୟ କରିଥିଲେ । ଏପରିକି ଲୋକଙ୍କ ଅଭିଯୋଗ ପାଇ ନର୍ଲା ପୁଲିସ ଘଟଣାସ୍ଥଳରେ ପହଞ୍ଚି ଥିବା ଜଣାପଡିଛି । ତେବେ ଚାରିଆଡେ ଚୋର ଡକାୟତିର ଏକ ପ୍ରଚାର ବହୁଳ ମାତ୍ରାରେ ହେଉଥିବା କାରଣରୁ ଗ୍ରାମାଞ୍ଚଳର ଲୋକେ ରାତିରେ ଡ୍ରୋନ୍ ଉଡାଣକୁ ଦେଖି ଆତଙ୍କିତ ହୋଇଥିଲେ । ତେବେ ଏ ସଂକ୍ରାନ୍ତରେ ତଦନ୍ତ କରି ପୁଲିସ ଏକ ଡ୍ରୋନକୁ ଜବତ ମଧ୍ୟ କରିସାରିଛି ।
ତଦନ୍ତରେ ଜଣାପଡିଛି ଯେ ଡ୍ରୋନ ମାଲିକ ପରୀକ୍ଷା ମୂଳକ ଭାବେ ଏହାକୁ ଉଡାଉଥିବା ବେଳେ ଉକ୍ତ ଡ୍ରୋନ କୌଣସି ଅପରାଧ ସହିତ ସଂପୃକ୍ତି ନାହିଁ । ଉକ୍ତ ଡ୍ରୋନ ଡିଜିସିଏ (ବେସାମରିକ ବିମାନ ଚଳାଚଳ ମହା ନିର୍ଦ୍ଦେଶକ) ଭାରତ ସରକାରଙ୍କ ଠାରେ ପଞ୍ଜିକୃତ ହୋଇଛି । ତେବେ ଉକ୍ତ ଡ୍ରୋନ୍ ରାତିରେ ଉଡାଣ ନକରି ଦିବସରେ କରିବା ପାଇଁ ମାଲିକଙ୍କୁ କଳାହାଣ୍ଡି ପୁଲିସ ପରାମର୍ଶ ଦେଇଛି । ତେବେ ଏଥିରେ କୌଣସି ଭୟଭୀତ ନହେବା ପାଇଁ ନର୍ଲା ବିଧାୟକ ଭୂପିନ୍ଦର ସିଂହ ସୋସିଆଲ ମିଡିଆ ଜରିଆରେ ନିଜ ନିର୍ବାଚନ ମଣ୍ଡଳୀର ବାସିନ୍ଦାଙ୍କୁ ଅନୁରୋଧ କରିଛନ୍ତି ।
