କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଅନ୍ତର୍ଗତ ବୁଡ଼ାଗୁଡ଼ା ପଞ୍ଚାୟତ ରେ ଥିବା ଏମ୍ ଆଇ ପି କଣ୍ଡାକରା ଡେମ୍ ଠାରୁ କଦଳୀଚୁଆଁ ଓ ଢେପାଗୁଡ଼ା ଗାଁ ମଝି ରାସ୍ତା ପାର୍ଶ୍ୱ ଦେଇ ଏକ କେନାଲ ଯାଉଥିବା ବ୍ରିଜ୍ କିଛି ଦିନ ତଳେ ଭାଙ୍ଗି ଯାଇଥିଲା। ଏଥିରେ ଜରି ବସ୍ତା ଗୁଡିକରେ ମାଟି ଓ ବାଲି ଭର୍ତ୍ତି କରି ଉକ୍ତ ସ୍ଥାନରେ ପକାଇ ମରାମତି କରାଯାଇଥିଲା କିନ୍ତୁ ଲଗାଣ ବର୍ଷାରେ ଏହା ଭୁଶୁଡ଼ି ଯିବା ଯୋଗୁଁ ପାଣି ଚାଷ ଜମିକୁ ଯିବା ବଦଳରେ ନାଳକୁ ପାଣି ଯାଇ ନଷ୍ଟ ହେଉଛି। ଏହି କେନାଲ ବ୍ରିଜ ଭାଙ୍ଗିଯିବା ପରେ ଢେପାଗୁଡ଼ା, ପଣସଗୁଡ଼ା, ଚାମରଯୋଡ଼ି, ଦେଉଳବାଡ଼ି, ବୁଡ଼ାଗୁଡ଼ା, ଅଡ୍ରୁବାଲି, ଅଲଣ୍ଡା ଏବଂ ଆଖପାଖ ଏମିତି ଅନେକ ଅଞ୍ଚଳର ଚାଷୀ ପ୍ରଭାବିତ ହୋଇଛନ୍ତି ବର୍ତ୍ତମାନ ଚାଷ ସମୟ ଚାଲିଥିବାରୁ ଚାଷୀ ଚିନ୍ତିତ ହୋଇପଡିଛନ୍ତି।
ଏହି ବିଷୟରେ ବିଭାଗୀୟ ଅଧିକାରୀଙ୍କୁ ଯୋଗାଯୋଗ କରିଥିଲେ କିନ୍ତୁ ଅଧିକାରୀ ଜଣକ କୌଣସି ସନ୍ତୁଷ୍ଟଜନକ ଉତ୍ତର ଦେଇ ନ ଥିଲେ ଯାହା ଫଳରେ ଅଞ୍ଚଳବାସୀ ଏକ ବୈଠକ କରି ନିଜେ ନିଜେ ଚାନ୍ଦା ଆଦାୟ କରି ଏହି କେନାଲ ବ୍ରିଜ ମରାମତି କରିବାକୁ ନିଷ୍ପତି ନେଇଥିଲେ। ଏହି ବିଷୟରେ ଖବର ପାଇ ସ୍ଥାନୀୟ ସ୍ବେଚ୍ଛାସେବୀ ସଂଗଠନ ସେବା ସେନାର କର୍ମକର୍ତ୍ତାମାନେ ଆସି ଭାଙ୍ଗିଥିବା କେନାଲ ବ୍ରିଜ୍ ଦେଖିବା ସହ ଗ୍ରାମବାସୀଙ୍କ ସହ ଆଲୋଚନା କରି ଏକ ଦାବୀପତ୍ର ଲେଖି ଅଞ୍ଚଳବାସୀଙ୍କ ସହ ଯାଇ ସ୍ଥାନୀୟ ଗୋଷ୍ଠି ଉନ୍ନୟନ ଅଧିକାରୀ ତାପସ୍ କୁମାର ଭୋଇଙ୍କୁ ଏଇ ଦାବୀପତ୍ର ପ୍ରଦାନ କରିଥିଲେ। ଦାବୀପତ୍ର ଗ୍ରହଣ କରି ଉକ୍ତ ଜାଗାକୁ ନିଜେ ଯାଇ ଦେଖି ଆସିବା ସହ ଚାଷୀଙ୍କ ସମସ୍ୟାର ସମାଧାନ କରିବା ପାଇଁ ବିଡ଼ିଓ ପ୍ରକାଶ କରିଛନ୍ତି।
