କଲମପୁର:କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ କେରପାଇ ଗ୍ରାମ ପଞ୍ଚାୟତ ଅନ୍ତର୍ଗତ ମେଲରପା ଗ୍ରାମରେ ବଜ୍ରପାତ ଯୋଗୁଁ ଗ୍ରାମର ଜଣେ ବୃଦ୍ଧା ଗୁରୁତର ଆହତ ହୋଇଛନ୍ତି। ତାଙ୍କୁ ପ୍ରଥମେ ରାୟଗଡା ଜିଲା କାଶୀପୁର ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସ୍ବାସ୍ଥ୍ୟବସ୍ଥା ଗୁରୁତର ଦେଖି ଡାକ୍ତର ତାଙ୍କୁ ରାୟଗଡା ଜିଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର ପାଇଁ ପରାମର୍ଶ ଦେଇଛନ୍ତି। ସୂଚନା ଅନୁଯାୟୀ ଆହତ ବୃଦ୍ଧା ଜଣକ ହେଲେ ବଳି ନାଏକଙ୍କ ସ୍ତ୍ରୀ ଧନେଇ ନାଏକ(୬୦) ବୋଲି ଜଣାପଡିଛି। ବୁଧବାର ଉକ୍ତ ବୃଦ୍ଧା ଜଣକ କୌଣସି କାରଣରୁ ବାହାରକୁ ଯାଇଥିବା ବେଳେ ବର୍ଷା ଓ ଘଡଘଡି ହେବା ଯୋଗୁଁ ଏକ ଗଛ ତଳେ ଆଶ୍ରୟ ନେଇଥିବାବେଳେ ସେଠାରେ ବଜ୍ରପାତ ହୋଇ ଥିଲା। ବଜ୍ରପାତ ଯୋଗୁ ଧନେଇ ଗରୁତର ଆହତ ହୋଇଥିବା ସୂଚନା ମିଳିଛି। ଏହାପରେ ଅମ୍ବୁଲାନ୍ସ ସହିତ ଯୋଗାଯୋଗ କରାଯାଇଥିଲେ ମଧ୍ୟ ଅମ୍ବୁଲାନ୍ସ ଉପଲବ୍ଧ ନଥିବାରୁ କେରପାଇ କାଚେଲେଖା ଗ୍ରାମର ସୁଶାନ୍ତ ନାଏକ ନାମକ ଜଣେ ଯୁବକ ସହଯୋଗ କରିଥିଲେ। ତାଙ୍କ ଗାଡିରେ ଗୁରୁତର ଆହତ ବୃଦ୍ଧାକୁ କାଶୀପୁର ଡାକ୍ତରଖାନାକୁ ନେଇଥିଲେ।
Comments are closed.