ଡେସ୍କ: କେନ୍ଦ୍ର ସୂଚନା ଓ ପ୍ରସାରଣ, ଯୁବବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର କହିଛନ୍ତି ଭାରତ ପରିଷ୍କାର ରହିଲେ ଫିଟ୍ ରହିବେ ଦେଶବାସୀ ଓ ଦେଶ ଶକ୍ତିଶାଳୀ ହେବ। ଭାରତୀୟ କ୍ରୀଡ଼ା ପ୍ରାଧିକରଣ ଓ ନେହେରୁ ଯୁବକେନ୍ଦ୍ରର ଖେଳାଳିମାନଙ୍କୁ ଲକ୍ଷ୍ନୌଠାରେ ଉଦବୋଧନ ଦେଲାବେଳେ ଶ୍ରୀ ଠାକୁର କହିଛନ୍ତି ଦେଶ ଆଜାଦୀ କା ଅମୃତ ମହୋତ୍ସବ ପାଳନ କରୁଥିବା ବେଳେ ଆମେ କ୍ରୀଡ଼ା, ସଂସ୍କୃତି ଓ ଫିଟ୍ ଭାରତ ଗଠନ କରିପାରିବା।
ସେ କହିଛନ୍ତି, ଖେଳାଳିମାନଙ୍କୁ ସବୁ ପ୍ରକାର ସୁବିଧା ଯୋଗାଇ ଦେବାକୁ ସରକାର ଉଦ୍ୟମ ଜାରି ରଖିଛନ୍ତି। ଲକ୍ଷ୍ନୌର ହଜରତଗଞ୍ଜଠାରୁ ଫିଟ୍ ଇଣ୍ଡିଆ-କ୍ଲିନ୍ ଇଣ୍ଡିଆ ଦୌଡ଼କୁ ଶୁଭାରମ୍ଭ କରି ଶ୍ରୀ ଠାକୁର ଏହା କହିଛନ୍ତି। ନେହେରୁ ଯୁବକେନ୍ଦ୍ର ଓ ଭାରତୀୟ କ୍ରୀଡ଼ା ପ୍ରାଧିକରଣ ପକ୍ଷରୁ ଲକ୍ଷ୍ନୌର କେଡି ସିଂ ବାବୁ ଷ୍ଟାଡିୟମରେ ଆୟୋଜିତ ଏକ ଉତ୍ସବରେ ସେ ଅଂଶଗ୍ରହଣ କରିଥିଲେ। ପରିଷ୍କାର ପରିଚ୍ଛନ୍ନ ରଖିବାର ଆବଶ୍ୟକତା ପ୍ରତି ଗୁରୁତ୍ୱାରୋପ କରି ଶ୍ରୀ ଠାକୁର କହିଛନ୍ତି ଏନ୍ଡିଏ ସରକାରଙ୍କ ଦ୍ୱାରା ଆରମ୍ଭ ହୋଇଥିବା ସଫେଇ ଅଭିଯାନ ଭାରତରେ ଅନେକ ପରିବର୍ତ୍ତନ ଆଣିଛି ଏବଂ ଲୋକମାନଙ୍କର ମନୋଭାବରେ ମଧ୍ୟ ପରିବର୍ତ୍ତନ ଆଣିବାରେ ସଫଳ ହୋଇଛି।
