ହରଭଙ୍ଗା:ହରଭଙ୍ଗା ବ୍ଲକ ପୁରୁଣାକଟକ ଥାନା ଅର୍ନ୍ତଗତ କରଞ୍ଜକଟା ଗ୍ରାମରେ ଦିନକୁ ଦିନ ଚୋରି ଘଟଣା ବୃଦ୍ଧି ପାଇବାରେ ଲାଗିଛି। ଗତ ୮ଦିନ ମଧ୍ୟରେ ଗ୍ରାମର ଦୁଇଟି ଦୋକାନରୁ ଏବଂ ଗୋଟିଏ ବିଦ୍ୟୁ୍ତ୍ ଟ୍ରାନ୍ସଫର୍ମର ଚୋରି ହୋଇଥିବା ଅଭିଯୋଗ ହୋଇଛି।ସୂଚନା ଅନୁସାରେ ଗତ ୪ତାରିଖ ଦିନ କଂରଜକଟାସ୍ଥିତ ଅମିତ ସାମଲଙ୍କ ଜନସେବା କେନ୍ଦ୍ରରୁ ଲାପଟପ୍, ସ୍କାନର ଭଳି ଦାମୀ ସାମଗ୍ରୀ ଚୋରି ହୋଇଥିଲା। ଏହାର ଠିକ୍ ଆଠଦିନ ନପୂରୁଣୁ କୃପାସିନ୍ଧୁ ସାହୁଙ୍କ ଗ୍ରୋସରୀ ଦୋକାନରୁ ଟଙ୍କା ସହ ଜିନିଷପତ୍ର ଚୋରି ହୋଇଥିଲା। ଶେଷରେ ନିକଟସ୍ଥ ଏମ.ଇସ୍କୁଲ ପାଖରେ ଥିବା ଏକ ବିଦ୍ୟୁ୍ତ୍ ଟ୍ରାନସଫର୍ମର ମଧ୍ୟ ଚୋରି ଘଟିଥିବା ଜଣାପଡିଛି। ଏ ବାବଦରେ ଅମିତ ସାମଲ ଏବଂ ବିଦ୍ୟୁତ୍ ବିଭାଗ ପକ୍ଷରୁ ପୁରୁଣାକଟକ ଥାନାରେ ଏତେଲା ମଧ୍ୟ ଦିଆଯାଇଛି।
ସୂଚନା ଥାଉ କି ପୁରୁଣାକଟକ ଥାନା ଅର୍ନ୍ତଗତ ଚାରିଛକ ବଜାର ଏବଂ ସାପ୍ତାହିକ ହାଟରୁ ନିୟମିତ ଚୋରି ଘଟଣା ବୃଦ୍ଧି ପାଉଥିବାବେଳେ ସମ୍ପ୍ରତି ଏବେ ଏହା କଂରଜକଟା ଭଳି ଗ୍ରାମାଚଂଳକୁ ବ୍ୟାପିବାରେ ଲାଗିଛି।ମାତ୍ର ଏଥିପ୍ରତି ସ୍ଥାନିୟ ପୁଲିସ ଆଦୌ ଚିନ୍ତାପ୍ରକଟ କରୁନଥିବାରୁ ସାଧାରଣଜନତା ମଧ୍ୟରେ ପୁଲିସର କାର୍ଯ୍ୟଶୈଳୀ ଉପରେ ଅସନ୍ତୋଷ ପ୍ରକାଶ ପାଇଛି।ତୁରନ୍ତ ଏ ଦିଗରେ ଜିଲ୍ଲାଆରକ୍ଷୀ ଅଧିକ୍ଷକ ସ୍ୱତନ୍ତ୍ର ଦୃଷ୍ଟି ଦେବାକୁ ଦାବି ହେଉଛି।
