ଲକ୍ଷ୍ମୀପୁର: କୋରାପୁଟ ଜିଲା ଲକ୍ଷ୍ମୀପୁର ସଦର ମହକୁମାର ଅଧିଷ୍ଠାତ୍ରୀ ମୁତ୍ୟାଲୁ ମା’ ଙ୍କ ନବଦିନାତ୍ମକ ଘଟଯାତ୍ରା ବୁଧବାର ଉଦଯାପିତ ହୋଇଯାଇଛି। ନଅ ଦିନର ଯାତ୍ରା ପରେ ଅସ୍ଥାୟୀ ଗୁଡିରୁ ମନ୍ଦିରକୁ ବିଜେ କରନ୍ତି ମା’। ସୋମବାର ଠାରୁ ମନ୍ଦିର ରୁ ମା’ ଘଟ ସହିତ ୮ ଗୋଟି ଘଟ ଓ ଏକ ଫୁଲ ଡଙ୍ଗରା କୁ ଶୋଭାଯାତ୍ରାରେ ଅସ୍ଥାୟୀ ଗୁଡ଼ିକୁ ଆଣିବା ବେଳେ ଗ୍ରାମର ହଜାର ହଜାର ଶ୍ରଦ୍ଧାଳୁ ମାଆଙ୍କର ଦର୍ଶନ କରିଥିଲେ। ବାଜା ରୋଷଣୀରେ ଯାତରା ପଦା କମ୍ପି ଉଠିଥିଲା।
ମଙ୍ଗଳବାର ବିଶ୍ରାମ ପରେ ଆରମ୍ଭ ହୋଇଥିଲା ଗାଁ ପରିକ୍ରମା। ସନ୍ଧ୍ୟାରୁ ଘଟ ଗୁଡିକ ସାହି ପରିକ୍ରମା କରି ପୁଣି ଅସ୍ଥାୟୀ ଗୁଡ଼ିକୁ ଫେରୁଥିଲା । ଏହି ଅବସରରେ ଗ୍ରାମର ଘର ଦ୍ବାର ମୁଁହ କୁ ଗୋବରରେ ଲିପାପୋଛା କରି ଚିତା ପକାଯାଇ ଥିବା ବେଳେ ବିଧି ମୁତାବକ ଘଟ ଗୁଡିକୁ ପହଞ୍ଚି ପୂଜା ନୈବେଦ୍ୟ ସହିତ ଅନେକ ମାନସିକ ଧାରୀ ନିଆଁ, କୁକୁଡା ଆଦି ଅର୍ପଣ କରିଥିଲେ। ସେହିପରି ପ୍ରଚଳିତ ପ୍ରଥା ଅନୁଯାୟୀ ରବିବାର ରାଜସ୍ବ ବିଭାଗ ଓ ବନବିଭାଗ ପକ୍ଷରୁ ନିଆଁ ଦିଆ ଯାଇଥିବା ବେଳେ ସୋମବାର ଥାନା ତରଫରୁ ମଧ୍ୟ ନିଆଁ ବ୍ଲକ ପଡିଆ ଠାରେ ଦିଆଯାଇଥିଲା।
ଏହାକୁ ଦେଖିବାକୁ ହଜାର ହଜାର ଲୋକଙ୍କ ସମାଗମ ହୋଇଥିଲା। ସେହିପରି ରବିବାର ଗାଁ ବନ୍ଧା ସହିତ ବାଘବେଶ, ଓ ଉତ୍ତପ୍ତ ଶାବଳକୁ ଜଡାତେଲ ଦ୍ବାରା ମନ୍ଥନ ଓ କଣ୍ଟା ଦୋଳିରେ ଝୁଲିବା ଆଦି ରୀତି ନୀତି ସମ୍ପନ୍ନ ହୋଇଥିଲା।
ମନୋରଞ୍ଜନ ପାଇଁ ସାଂସ୍କୃତିକ କାର୍ଯ୍ୟକ୍ରମ ସହିତ ରାମ ଦୋଳିର ମଜା ନେଇଥିଲେ ପିଲା ଠାରୁ ଆରମ୍ଭ କରି ବଡ ପର୍ଯ୍ୟନ୍ତ। ସେହିପରି କିଣା ବିକା ପାଇଁ ବିଭିନ୍ନ ରକମର ଦୋକାନ ସହିତ ମୀନାବଜାର ମଧ୍ୟ ପଡିଥିଲା। ବୁଧବାର ପୂର୍ବାହ୍ନ ପ୍ରାୟ ୧୧ ଟା ରେ ଅସ୍ଥାୟୀ ଗୁଡିରେ ସମସ୍ତ ରୀତି ନୀତି ଅନୁଷ୍ଠିତ ହେବା ସହିତ ପରିଚାଳନା କମିଟି ପକ୍ଷରୁ ନିଆଁ ଦିଆଯାଇଥିଲା, ଯାହାକୁ ମାଡ଼ି ଘଟ ବାହକମାନେ ବାଜା ମହୂରୀ ର ତାଳେ ତାଳେ ନାଚି ମନ୍ଦିରରେ ପ୍ରବେଶ କରିଥିଲେ।
