ଭୁବନେଶ୍ବର : ଗୁଜରାଟର ଗାନ୍ଧୀନଗର ମହାତ୍ମା ମନ୍ଦିରଠାରେ ଗତ ତିନିଦିନ ଧରି ଚାଲଥିବା ଗ୍ଲୋବାଲ୍ ଆୟୁଷ ଇନଭେଷ୍ଟମେଣ୍ଟ ଆଣ୍ଡ ଇନୋଭେସନ୍ (ଜିଆଇଆଇଏସ) ଶିଖର ବୈଠକ ଶୁକ୍ରବାର ଶେଷ ହେଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ବୁଧବାର ଏହାକୁ ଉଦ୍ଘାଟନ କରିଥିଲେ। ଏହି ବୈଠକରେ ଓଡ଼ିଶାରୁ ଏକମାତ୍ର ପ୍ରତିନିଧି ଭାବେ ଯୋଗ ଦେଇଥିଲେ ଭୁବନେଶ୍ବର ବିଜି ଫାର୍ମାର ସତ୍ବାଧିକାରୀ ଜ୍ଞାନ ରଂଜନ ଦାଶ ।
ବିଭିନ୍ନ ପ୍ରକାର ପାରମ୍ପରିକ ଆୟୁର୍ବେଦିକ ଔଷଧ ଉତ୍ପାଦ କ୍ଷେତ୍ରରେ ସୁନାମ ଅର୍ଜନ କରିବା ସହିତ ଏକ୍ଷେତ୍ରରେ ଗବେଷଣା ଜାରି ରଖିଥିବା ଶ୍ରୀ ଦାଶ ଆୟୁଷ ମନ୍ତ୍ରଣାଳୟ ପକ୍ଷରୁ ନିମନ୍ତ୍ରଣ ପାଇ ଏହି ଶିଖର ବୈଠକରେ ଯୋଗ ଦେଇଥିଲେ। ବିଶେଷ କରି ଆୟୁର୍ବେଦ ଔଷଧ ଉତ୍ପାଦନ କ୍ଷେତ୍ରରୁ ସେ ରାଜ୍ୟର ଏକମାତ୍ର ପ୍ରତିନିଧି ଭାବେ ଏହି ଅନ୍ତର୍ଜାତୀୟ ବୈଠକରେ ଯୋଗ ଦେଇଥିଲେ। ତିନି ଦିନିଆ ଶିଖର ବୈଠକରେ ଆୟୁର୍ବେଦ ଓ ପାରମ୍ପରିକ ଔଷଧ ଉତ୍ପାଦନ ଏବଂ ଏହାର ବ୍ୟବହାର ସଂପର୍କରେ ବିଭିନ୍ନ କର୍ମଶାଳା ଓ ଆଲୋଚନାଚକ୍ରମାନ ଅନୁଷ୍ଠିତ ହୋଇଥିଲା । ବିଶେଷ କରି ‘ହର ଘର ଆୟୁର୍ବେଦ’ ବା ପ୍ରତ୍ୟେକ ଘରେ ଆୟୁର୍ବେଦକୁ ପହଞ୍ଚାଇବା ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ବାନ ବେଶ ଉତ୍ସାହଜନକ ଥିଲା ବୋଲି ସେ ମତ ଦେଇଛନ୍ତି । ବୈଠକ ଅବସରରେ କେନ୍ଦ୍ର ଆୟୁଷ ଓ ମହିଳା ଏବଂ ଶିଶୁ ବିକାଶ ମନ୍ତ୍ରୀ ଡକ୍ଟର ମୁଞ୍ଜପାରା ମହେନ୍ଦ୍ରଭାଇଙ୍କ ସହିତ ସେ କିଛି ସମୟ ଆଲୋଚନା କରି ଓଡ଼ିଶାରେ ଆୟୁର୍ବେଦର ପ୍ରସାର ପାଇଁ ଥିବା ଅପାର ସମ୍ଭାବନା ବିଷୟରେ ଅବଗତ କରାଇଥିଲେ। ବିଦେଶରୁ ଆସିଥିବା ଅନେକ ପ୍ରତିନିଧିଙ୍କ ଆୟୁର୍ବେଦ ପ୍ରତି ଆଗ୍ରହ ଓ ଆକର୍ଷଣ ତାଙ୍କୁ ବେଶ ଉତ୍ସାହିତ କରିଥିବା ଶ୍ରୀ ଦାଶ କହିଛନ୍ତି।
ଏହି ବୈଠକ ଆଗାମୀ ଦିନରେ ରାଜ୍ୟ ତଥା ଦେଶରେ ପାରମ୍ପରିକ ଔଷଧ ଉତ୍ପାଦନ କ୍ଷେତ୍ରକୁ ପୁଞ୍ଜିନିବେଶକୁ ଆତ୍କୃଷ୍ଟ କରିବ ବୋଲି ଶ୍ରୀ ଦାଶ ମତବ୍ୟକ୍ତ କରିଛନ୍ତି ।
