ନୂଆଦିଲ୍ଲୀ – ପାକିସ୍ତାନରେ ୧୨୩ କିଲୋମିଟର ଭିତରେ ଭାରତର ଏକ ମିସାଇଲ୍ ପଡିଛି । ପାକିସ୍ତାନ ପକ୍ଷରୁ ଏହାର ଦୃଢ ପ୍ରତିବାଦ କରାଯାଇଛି । ଭାରତ ଏହି କଥାକୁ ସ୍ୱୀକାର କରିବା ସହ ଏକ ବୈଷୟିକ ତ୍ରୁଟି ଯୋଗୁଁ ଏପରି ହୋଇଥିବା କଥା କହିଛି । ସାରା ବିଶ୍ୱରେ ଏବେ ଯୁଦ୍ଧର ବିଭେଷିକା ଭିତରେ ଏହା ଏକ ନୂଆ ବିବାଦ ସୃଷ୍ଟି କରିଛି ।
ପାକିସ୍ତାନ ସେନା ପକ୍ଷରୁ ଏ ବିଷୟରେ ସାମ୍ବାଦିକ ସମ୍ମିଳନୀ କରି ସୂଚନା ଦିଆଯିବା ସହ ଇସଲାମାବାଦରେ ଅବସ୍ଥାପିତ ଭାରତର ମିଶନ ମୁଖ୍ୟଙ୍କୁ ଡକାଇ ଦୃଢ ପ୍ରତିବାଦ କରାଯାଇଛି । ୯ ତାରିଖ ସନ୍ଧ୍ୟା ସମୟରେ ଏହି ଘଟଣା ଘଟିଥିଲା । ସଂଧ୍ୟା ୬ଟା ୪୫ ବେଳେ ଭାରତର ଏକ ମିସାଇଲ୍ ପାକିସ୍ତାନ ସୀମା ଭିତରକୁ ୧୨୩ କିଲୋମଟିର ଯିବା ସହ ଖାନେଓ୍ୱଲ ଜିଲ୍ଲାର ମିଆଁ ଚାନୁଠାରେ ପଡିଥିଲା । ମାତ୍ର ଏଥିରେ କୌଣସି କ୍ଷତି ହୋଇ ନଥିବା ସୂଚନା ମିଳିଛି ।
ତେବେ ଭାରତର ପ୍ରତିରକ୍ଷା ମନ୍ତ୍ରାଳୟ ଏହାକୁ ସ୍ୱୀକାର କରିବା ସହ ଏକ ବୈଷୟିକ ତ୍ରୁଟି ଯୋଗୁଁ ଏପରି ହୋଇଥିବା କଥା କହିଛି । ଭାରତ ସରକାର ଏହାର ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦେଶ ଦେଇଛନ୍ତି । ପାକିସ୍ତାନ ଏହାର ବିରୋଧ କରିବା ସହ ଏହା ଦାୟିତ୍ୱହୀନତା ବୋଲି ଅଭିଯୋଗ କରିଛି । ଏହା କେଉଁ ମିସାଇଲ୍ ତାହା ଜଣା ପଡି ନଥିବା ବେଳେ ଏକ ବ୍ରାହ୍ମୋସ ମିସାଇଲ୍ ହୋଇଥାଇପାରେ ବୋଲି କିଛି ଜାତୀୟ ଗଣମାଧ୍ୟମରେ ଖବର ପ୍ରକାଶିତ ହୋଇଛି ।
