ଭୁବନେଶ୍ୱର: ବଜେଟ୍ ଅଧିବେଶନ ଯେତିକି ପାଖେଇ ଆସୁଛି ତାକୁ ନେଇ ସରକାରଙ୍କୁ ଘେରିବା ପାଇଁ ଶିକ୍ଷକଙ୍କ ମଧ୍ୟରେ ଉତ୍କଣ୍ଠା ବଢ଼ି ଚାଲିଛି। ସରକାରଙ୍କ ପକ୍ଷରୁ ପ୍ରତିଶ୍ରୁତି ମିଳିଥିଲେ ହେଁ ତାହା ପୂରଣ ହେଉ ନଥିବାରୁ ୨୦ରୁ ପ୍ରାଥମିକ ଶିକ୍ଷକ ସଂଘ ସରକାରଙ୍କୁ ଘେରିବାପାଇଁ ପ୍ରସ୍ତୁତି ଆରମ୍ଭ କରିଛି। ଇତିମଧ୍ୟରେ ଶିକ୍ଷା ସହାୟକ ସଂଘ ଆନ୍ଦୋଳନ କରି ୪ଟି ଦାବି ପୂରଣ କରିଥିବାବେଳେ ଓଷ୍ଟା ଓ ମିଳିତ ମଞ୍ଚର ଦାବି ଜାରି ରହିଛି। ଅନ୍ୟପକ୍ଷରେ ପ୍ରାଥମିକ ଶିକ୍ଷକ ସଂଘ ଆନ୍ଦୋଳନକୁ ତୀବ୍ର କରିବ ବୋଲି ସଭାପତି ବ୍ରହ୍ମାନନ୍ଦ ମହାରଣା ଚେତାବନୀ ଦେଇଛନ୍ତି। ଶ୍ରୀ ମହାରଣା କହିଛନ୍ତି ଯେ ତିନୋଟି ପର୍ୟ୍ୟାରେ ହେବାକୁ ଥିବା ଆନ୍ଦୋଳନ ଆସନ୍ତାକାଲିଠାରୁ ଜିଲା ଶିକ୍ଷା ଅଧିକାରୀଙ୍କ କାର୍ୟ୍ୟାଳୟ ସମ୍ମୁଖରେ କରାଯିବ। ଯଦି ସରକାର ଦୃଷ୍ଟି ନଦେଲେ ୨୨ରୁ ୫୦ହଜାର ଶିକ୍ଷକ ସମୂହ ଛୁଟି ନେବେ। ନିଗମ କର୍ମଚାରୀଙ୍କ କ୍ଷେତ୍ରରେ ସପ୍ତମବେତନ କମିଶନ ଲାଗୁ କରୁଥିବାବେଳେ ଶିକ୍ଷକମାନଙ୍କ ପ୍ରତି ସରକାର କାହିଁକି କାଳକ୍ଷେପଣ ନୀତି ଅବଲମ୍ବନ କରୁଛନ୍ତି ତାହା ବୁଝାପଡୁନାହିଁ। ଯଦି ନୂତନ ପେନସନ ଯୋଜନାଭୁକ୍ତ ପ୍ରାଥମିକ ଶିକ୍ଷକମାନଙ୍କ ମୂଳଦରମା ୫୨୦୦ଟଙ୍କା ସହିତ ୨୮୦୦ଗ୍ରେଡ ପେ ପ୍ରଦାନ ଏବଂ ସଂଶୋଧିତ ହାରରେ ସପ୍ତମ ବେତନ କମିଶନ ଲାଗୁ ସହିତ ୬ବର୍ଷ ପର୍ୟ୍ୟନ୍ତ ଗୋଟିଏ ଲେଖାଏଁ ଇନ୍କ୍ରିମେଣ୍ଟ ପ୍ରଦାନ ନକରନ୍ତି ତେବେ ଆନ୍ଦୋଳନକୁ ଜୋରଦାର କରାଯିବ। ଏହାସହିତ ସଂଘ ପକ୍ଷରୁ ଶିକ୍ଷକ, କିରାଣି ଓ ପିଅନ ପଦ ତୁରନ୍ତ ପୂରଣ କରିବାପାଇଁ ମଧ୍ୟ ଦାବି କରାଯିବ। ଏନେଇ ଆଜି ଅନୁଷ୍ଠିତ ବୈଠକରେ ସମ୍ପାଦକ ବଙ୍କିମ ଚନ୍ଦ୍ର ସାଗର, ଚକାନନ୍ଦ କମ୍ପ, ନିରୋଜ ମହାପାତ୍ର, ସୁରେନ୍ଦ୍ର କୁମାର ରାଉତ, ବିଭୁପ୍ରସାଦ ସାହୁ ପ୍ରମୁଖ ଉପସ୍ଥିତ ଥିଲେ।
