ଭୁବନେଶ୍ୱର: ହାଇଟେକ୍ ମେଡିକାଲ କଲେଜ ଖେଳପଡ଼ିଆରେ ଆନ୍ଧ୍ରପ୍ରଦେଶ ଓ ଓଡ଼ିଶା ମଧ୍ୟରେ ଆନ୍ତଃରାଜ୍ୟ ଦ୍ୱିପାକ୍ଷିକ ଟି୨୦ ଦୃଷ୍ଟିହୀନ କ୍ରିକେଟ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏଥିରେ ଓଡ଼ିଶା ଚମ୍ପିଆନ ହୋଇଛି। ଉଭୟ ଦଳ ମଧ୍ୟରେ ଶନିବାର ଓ ରବିବାର ଦୁଇଦିନ ଧରି ମୋଟ ୩ ଟି ୨୦ଟ୍ୱୋଣ୍ଟି ମ୍ୟାଚ ଖେଳାଯାଇଥିଲା। ମହମ୍ମଦ ଜାଫର ଇକବାଲଙ୍କ ନେତୃତ୍ୱରେ ଖେଳିଥିବା ଓଡ଼ିଶା ୨ଟି ଓ ଆନ୍ଧ୍ରପ୍ରଦେଶ ଗୋଟିଏ ମ୍ୟାଚରେ ବିଜୟୀ ହୋଇଥିଲା। ଜାଫର ଇକ୍ବାଲ ମ୍ୟାନ ଅଫ ଦି ଫାଇନାଲ ଓ ବି-୧ ବିଭାଗରେ ମ୍ୟାନ ଅଫ ଦି ସିରିଜ୍, ବି-୨ ବିଭାଗରେ ପଙ୍କଜ ଭୂଏ ମ୍ୟାନ ଅଫ ଦି ସିରିଜ ବିବେଚିତ ହୋଇଥିଲେ। ଅତିଥି ଭାବେ ରାଜ୍ୟ ଭିନ୍ନକ୍ଷମ ଆୟୁକ୍ତ ଡ. ମିନତି ବେହେରା, ହାଇଟେକ୍ ମେଡ଼ିକାଲ କଲେଜ ପ୍ରଶାସନିକ ଅଧିକାରୀ ଭୀଷ୍ମ ପ୍ରସାଦ ରଥ, ସ୍ପେଶାଲ ଅଲିମ୍ପିକ୍ ଭାରତ ଓଡ଼ିଶା ନିର୍ଦେଶକ ପ୍ରକାଶ ରଥ ପୁରସ୍କାର ପ୍ରଦାନ କରିଥିଲେ।
