ଗୋପାଳପୁର: ବ୍ରହ୍ମପୁର ବିଶ୍ବବିଦ୍ୟାଳୟ ହଷ୍ଟେଲ ଫି’ ହ୍ରାସ କରିବା ପାଇଁ ଛାତ୍ରଛାତ୍ରୀମାନେ ଦାବି କରିଛନ୍ତି। ବ୍ରହ୍ମପୁର ବିଶ୍ବବିଦ୍ୟାଳୟ ପରିସରରେ ଥିବା ବିଭିନ୍ନ ଛାତ୍ରାବାସରେ ରହୁଥିବା ଛାତ୍ର ଓ ଛାତ୍ରୀଙ୍କ ହଷ୍ଟେଲ ଫି’ କମାଇବା ଦାବିରେ ଅନ୍ତେବାସୀମାନେ ୱାଡନଙ୍କୁ ଲିଖିତ ଅଭିଯୋଗ ପ୍ରଦାନ କରିଛନ୍ତି। ଅନ୍ତେବାସୀଙ୍କ ଅଭିଯୋଗ ଅନୁଯାୟୀ ୨୦୨୦-୨୧ ପ୍ରଥମ ଶିକ୍ଷା ବର୍ଷରେ ହଷ୍ଟେଲରେ ରହିବା ନିମନ୍ତେ ବିଦ୍ୟାର୍ଥୀ ମାନେ ଗତ ଫେବୃୟାରୀ ମାସରେ ୩୩୦୦ ଟଙ୍କା ବିଶ୍ଵବିଦ୍ୟାଳୟରେ ଜମା କରିଥିଲେ। ଏହାପରେ ବିଶ୍ବବିଦ୍ୟାଳୟ ପକ୍ଷରୁ ବିଦ୍ୟାର୍ଥୀ ମାନଙ୍କୁ ହଷ୍ଟେଲ ରୁମ ଆବଣ୍ଟନ କରାଯାଇଥିଲା। କିନ୍ତୁ କରୋନା ଦୃତୀୟ ଲହରକୁ ଦୃଷ୍ଟିରେ ରଖି ଗତ ମେ ମାସରେ ୧୩ତାରିଖରେ ହଷ୍ଟେଲ ଖାଲି କରିବାକୁ ବିଜ୍ଞପ୍ତି ଜାରି ହୋଇଥିଲା। ଏହାପରେ ମେ ୧୬ତାରିଖରେ ବିଦ୍ୟାର୍ଥୀ ମାନେ ହଷ୍ଟେଲ ଖାଲି କରିଥିଲେ। କରୋନା କଟକଣା କୋହଳ ହେବା ପରେ ଅଗଷ୍ଟ ମାସରେ ହଷ୍ଟେଲ ଖୋଲାଯାଇ ଛାତ୍ରଛାତ୍ରୀମାନଙ୍କୁ ରହିବାକୁ ଅନୁମତି ଦିଆଯାଇଥିଲା। ପୁଣି ଚଳିତ ମାସ ୧ ତାରିଖରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ପକ୍ଷରୁ ହଷ୍ଟେଲ ଫି’ ବାବଦରେ ବିଜ୍ଞପ୍ତି ଜାରି କରିଛନ୍ତି।
ଉକ୍ତ ବିଜ୍ଞପ୍ତିରେ ୫ ହଜାର ୩୫୦ ଟଙ୍କା ପଇଠ ପାଇଁ ଉଲ୍ଲେଖ ରହିଛି। ଆସନ୍ତା ୮ ତାରିଖରେ ମଧ୍ୟରେ ପଇଠ ପାଇଁ ସମୟ ଧାଯ୍ୟ କାରାଯାଇଥିବାରୁ ଏହାକୁ ନେଇ ଛାତ୍ରଛାତ୍ରୀ ମହଲରେ ଅସନ୍ତୋଷ ପ୍ରକାଶ ପାଇଛି । ଛାତ୍ରଛାତ୍ରୀମାନଙ୍କ କହିବା ଅନୁଯାୟୀ ଦୀର୍ଘ ୪ ମାସ ହଷ୍ଟେଲରେ ରହି ନ ଥିବାରୁ କର୍ତ୍ତୃପକ୍ଷ ଧାଯ୍ୟ କରିଥିବା ହଷ୍ଟେଲ ଫି’ ହ୍ରାସ କରିବା ପାଇଁଁ ଅନୁରୋଧ କରାଯାଇଛି। ଏ ନେଇ ୱାର୍ଡନ ପ୍ରଫେସର୍ ପ୍ରସନ୍ନ କୁମାର ସ୍ବାଇଁ ଓ ଛାତ୍ରୀ ନିବାସର ୱାର୍ଡ଼଼ନ ପ୍ରଫେସର ପୁଷ୍ପାଞ୍ଜଳୀ ସାମନ୍ତରାୟଙ୍କ ସହ ଯୋଗାଯୋଗ ବେଳେ ଉଭୟ କହିଥିଲେ ଯେ ହଷ୍ଟେଲ କମିଟି ବୈଠକରେ ଅନ୍ତେବାସୀଙ୍କ ଅଭିଯୋଗକୁ ଦୃଷ୍ଟି ଆକର୍ଷଣ କରାଯିବ। କମିଟିର ନିଷ୍ପତ୍ତି କ୍ରମେ ୫ଶହ ଟଙ୍କା କମ କରାଯାଇଥିବା କହିଛନ୍ତି। କିନ୍ତୁ ଛାତ୍ର ଛାତ୍ରୀ ମାନେ ଫି’କୁ ସମ୍ପୂର୍ଣ୍ଣ ଛାଡ କରିବା ପାଇଁ ଦାବି କରିଛନ୍ତି।
