ଖୋର୍ଦ୍ଧା : ୧୬ ନମ୍ବର ଜାତୀୟ ରାଜପଥ ଖୋର୍ଦ୍ଧା ନିକଟରୁ ଏକ ଗଞ୍ଜେଇ ଭର୍ତି କାରକୁ ଖୋର୍ଦ୍ଧା ଆଦର୍ଶ ଥାନା ପୁଲିସ ଜବତ କରିବା ସହ ଜଣେ ଅଭିଯୁକ୍ତକୁ ଗିରଫ କରିଥିବା ଜଣାପଡିଛି । ଏନେଇ ଖୋର୍ଦ୍ଧା ଆରକ୍ଷୀ ଅଧିକ୍ଷକ ରାଜ କିଶୋର ଦୋରା ବୁଧବାର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ମିଳିଥିବା ସୂଚନା ଅନୁଯାଇ ବାଲିଗୁଡାରୁ ଭୁବନେଶ୍ୱର ଅଭିମୁଖେ ଏକ କାରରେ ବିପୁଳ ପରିମାଣର ଗଞ୍ଜେଇ ଚାଲାଣ ହେଉଥିବା ଖୋର୍ଦ୍ଧା ପୁଲିସକୁ ସୂଚନା ମିଳିଥିଲା । ଏସପିଙ୍କ ନିର୍ଦେଶ କ୍ରମେ ଖୋର୍ଦ୍ଧା ଉପଖଣ୍ଡ ପୁଲିସ ଅଧିକାରୀ(ଏସଡିପିଓ) ସୁଶିଲ ମିଶ୍ର ଓ ଆଦର୍ଶ ଥାନା ଅଧିକାରୀ ସଞ୍ଜୟ ପଟ୍ଟନାୟକଙ୍କ ତତ୍ୱାବଧାନରେ ଏକ ଦଳ ଗଠନ ହୋଇଥିଲା। ମଙ୍ଗଳବାର ଅପରାହ୍ଣରେ ରିଲାଏନ୍ସ ପେଟ୍ରୋଲ ପମ୍ପ ନିକଟରେ ପୁଲିସ କାରକୁ ଅଟକାଇ ଯାଂଚ କରିବାରେ ଭିତରେ ଗଞ୍ଜେଇ ବଣ୍ଡଲ ଥିବା ଜଣାପଡିଥିଲା । ଜଣେ ପୁଲିସର ଉପସ୍ଥିତି ଦେଖି ଖସି ପଳାଇଥିବା ବେଳେ ଆଉ ଜଣେ ଧରାପଡିଥିଲା । ଗିରଫ ଅଭିଯୁକ୍ତ ଜଣଙ୍କ ନୟାଗଡ ଜିଲା ପତେଗଡ ଥାନା ଜାମୁସାହିର ପ୍ରମୋଦ ସାହୁ(୨୫) । ପରେ ଖୋର୍ଦ୍ଧା ଏଗଜୁଟିଭ ମାଜିଷ୍ର୍ଟ୍ରେଟଙ୍କ ଉପସ୍ଥିତିରେ ଗଞ୍ଜେଇ ଓଜନ କରାଯାଇଥିଲା। ଜବତ ୧୦୦କେ.ଜି ଓଜନ ଗଞ୍ଜେଇର ଆନୁମାନିକ ମୂଲ୍ୟ ୧୦ ଲକ୍ଷ ଟଙ୍କା ହେବ ବୋଲି ଏସପି ପ୍ରକାଶ କରିଛନ୍ତି। ଗଞ୍ଜେଇ ଚାଲାଣରେ ବ୍ୟବହୃତ କାରକୁ ଜବତ କରାଯାଇଛି । ଖସିପଳାଇ ଥିବା ଅନ୍ୟ ଗଞ୍ଜେଇ ବେପାରୀକୁ ଧରିବାକୁ ପୁଲିସ ଉଦ୍ୟମ କରୁଛି । ତେବେ ତଦନ୍ତରେ ବାଧା ଆସିବା ଦୃଷ୍ଟିରୁ ପୁଲିସ ତାର ନାମ ପ୍ରକାଶ କରିନାହିଁ । ଏହି ସାମ୍ବାଦିକ ସମ୍ବିଳନୀରେ ଆରକ୍ଷୀ ଅଧିକ୍ଷକ ଶ୍ରୀ ଦୋରା ଓ ଉପଖଣ୍ଡ ପୁଲିସ ଅଧିକାରୀ ଶ୍ରୀ ମିଶ୍ରଙ୍କ ସହ ଡିଏସପି ଏସ.କେ ପଣ୍ଡା, ଆଦର୍ଶ ଥାନା ଅଧିକାରୀ ଶ୍ରୀ ପଟ୍ଟନାୟକ, ଶିଳ୍ପାଞ୍ଚଳ ଫାଣ୍ଡି ଅଧିକାରୀ ଦିଗ୍ ବିଜୟ ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ। ଗିରଫ ଅଭିଯୁକ୍ତକୁ ବୁଧବାର କୋର୍ଟ ଚାଲାଣ କରାଯାଇଛି।
