ନୂଆଦିଲ୍ଲୀ : ଜାମ୍ମୁ କାଶ୍ମୀର ସମ୍ବିଧାନ ଉପରେ ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଅଜିତ ଡୋଭାଲଙ୍କ ମନ୍ତବ୍ୟକୁ ନେଇ ବିବାଦ ଆରମ୍ଭ ହୋଇଛି। ଏହାକୁ ଜାମ୍ମୁ କାଶ୍ମୀରର ବହୁ ରାଜନୈତିକ ଦଳ ଏବଂ ସଂଗଠନ ବିରୋଧ କରିଛନ୍ତି। ପ୍ରକାଶ ଯେ ମଙ୍ଗଳବାର ଡୋଭାଲ କହିଥିଲେ ଯେ ଜାମ୍ମୁ କାଶ୍ମୀର ପାଇଁ ଅଲଗା ସମ୍ବିଧାନ ହେବା ସମ୍ଭବତଃ ଏକ ତ୍ରୁଟି ଥିଲା। ସାର୍ବଭୌମତ୍ୱରେ କେବେ ବୁଝାମଣା କରାଯାଇ ହେବନି। ସୁପ୍ରିମକୋର୍ଟରେ ଧାରା ୩୫-ଏ’ର ସାମ୍ବିଧାନିକ ବୈଧତା ନେଇ ଶୁଣାଣି ଚାଲିଥିବାବେଳେ ଡୋଭାଲଙ୍କ ମନ୍ତବ୍ୟକୁ ଜାମ୍ମୁ କାଶ୍ମୀର ରାଜନେତା ବିରୋଧ କରିଛନ୍ତି। ଧାରା ୩୫-ଏ’ରେ ଜାମ୍ମୁ କାଶ୍ମୀର ବାସୀଙ୍କୁ ଏକ ସ୍ୱତନ୍ତ୍ର ଏବଂ କିଛି ବିଶେଷାଧିକାର ପ୍ରଦାନ କରାଯାଇଛି। ଦେଶର ପ୍ରଥମ ଉପପ୍ରଧାନମନ୍ତ୍ରୀ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଲିଖିତ ଏକ ପୁସ୍ତକର ଉନ୍ମୋଚନ ଉତ୍ସବରେ ଉଦ୍ବୋଧନ ଦେଇ ଡୋଭାଲ ଏହା କହିଥିଲେ। ସେ କହିଥିଲେ ଯେ ସାର୍ବଭୌମତ୍ୱକୁ ଦୁର୍ବଳ ଓ ତ୍ରୁଟିପୂର୍ଣ୍ଣ ମାଧ୍ୟମରେ ପରିଭାଷିତ କରାଯାଇ ହେବନି। ତେଣୁ ଜାମ୍ମୁ କାଶ୍ମୀର ପାଇଁ ଅଲଗା ସମ୍ବିଧାନ ସମ୍ଭବତଃ ଏକ ତ୍ରୁଟି ଥିଲା। ଡୋଭାଲଙ୍କ ଏହି ମନ୍ତବ୍ୟକୁ ଜାମ୍ମୁ କାଶ୍ମୀର ନ୍ୟାସନାଲ କନଫରେନ୍ସ ନେତା ମୁସ୍ତଫା କମାଲ ବିରୋଧ କରିଛନ୍ତି। ସରକାର ଡୋଭାଲଙ୍କ ମନ୍ତବ୍ୟକୁ ନେଇ ସ୍ପଷ୍ଟୀକରଣ ଦିଅନ୍ତୁ, ନଚେତ ଏହାକୁ ସରକାରଙ୍କ ମତ ବୋଲି ଧରାଯିବ ବୋଲି ସେ କହିଛନ୍ତି। ସେହିପରି ପିପିଡି ନେତା ରଫି ଅହମଦ ମୀର ଡୋଭାଲଙ୍କ ଭଳି ଲୋକ ଏଭଳି ଦାୟିତ୍ୱହୀନ ମନ୍ତବ୍ୟ ଦେବା ଠିକ୍ ନୁହେଁ ବୋଲି କହିଛନ୍ତି।
Popular Categories
Previous article
Next article