ପ୍ରତିମାସରେ ଗ୍ରାମାଞ୍ଚଳ ବିକାଶ ପାଇଁ ତେଲେଙ୍ଗାନା ସରକାର ଦେବେ ୩୩୯ କୋଟି ଟଙ୍କା

ହାଇଦରାବାଦ: ତେଲେଙ୍ଗାନା ସରକାର ରାଜ୍ୟର ଗ୍ରାମାଞ୍ଚଳ ବିକାଶ ପାଇଁ ପ୍ରତିମାସରେ ୩୩୯ କୋଟି ଟଙ୍କା ଯୋଗାଇଦେବେ। ତାହାସହିତ ସହରାଞ୍ଚଳ ବିକାଶ ନିମନ୍ତେ ମାସକୁ ୧୪୮ କୋଟି ଟଙ୍କା ଯୋଗାଇ ଦିଆଯିବ। ଏଥିପାଇଁ ସରକାର ଏକ ନୂଆ ପଞ୍ଚାୟତିରାଜ ଓ ମ୍ୟୁନିସିପାଲିଟି ଆଇନ ଆଣିଥିବା କହିଛନ୍ତି ରାଜ୍ୟ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ। ଏଭଳି ଏକ ଉଦ୍ୟମ ଦେଶରେ ପ୍ରଥମ ଥର କରାଯାଉଥିବା ସେ କହିଛନ୍ତି। ରାଜ୍ୟ ସରକାର ଗ୍ରାମ ଏବଂ ମ୍ୟୁନିସିପାଲିଟିଗୁଡିକୁ ବିପୁଳ ଆର୍ଥିକ ସହାୟତା ଯୋଗାଇଦେବା ସହିତ ରାଜ୍ୟରେ ଖାଲି ପଡିଥିବା ସମସ୍ତ ପଦବୀ ପୂରଣ କରିଛନ୍ତି ବୋଲି ମୁଖ୍ୟମନ୍ତ୍ରୀଙ୍କ ଦପ୍ତରରୁ ପ୍ରକାଶିତ ଏକ ବିବୃତିରେ କୁହାଯାଇଛି।
ମୁଖ୍ୟମନ୍ତ୍ରୀ କହିଛନ୍ତି ଘୋଷଣା ମୁତାବକ ପ୍ରତି ମାସରେ ଏହି ଅର୍ଥ ଯୋଗାଇ ଦିଆଯିବ। ସେଥିରେ ତିଳେହେଲେ ଅବହେଳା କରାଯିବ ନାହିଁ। ସେ ଏକଥା ମଧ୍ୟ କହିଛନ୍ତି ଯେ ସରକାର କରୁଥିବା ଯୋଜନାଗୁଡିକ ସଫଳ କରାଇବାରେ ପଞ୍ଚାୟତିରାଜ ଏବଂ ମ୍ୟୁନିସିପାଲିଟି କର୍ମଚାରୀମାନେ କାହିଁକି ବିଫଳ ହେଉଛନ୍ତି ତାହା ସରକାର ଜାଣିବାକୁ ଚେଷ୍ଟା କରୁଛନ୍ତି। ତାଙ୍କର ଅଚାନକ ଗସ୍ତ ସମୟରେ ଯଦି କେହି ଏଥିରେ ଖିଲାପ କରୁଥିବା ଲକ୍ଷ୍ୟ କରାଯାଏ ତେବେ ତାଙ୍କୁ ଛଡାଯିବ ନାହିଁ। ସୂଚନାଯୋଗ୍ୟ ଯେ ରାଜ୍ୟରେ ‘ପଲ୍ଲି ଆଣ୍ଡ ପଟ୍ଟନା ପ୍ରଗତି’ କାର୍ଯ୍ୟକ୍ରମର ସମୀକ୍ଷା ନିମନ୍ତେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଅଧ୍ୟକ୍ଷତା କରି ମୁଖ୍ୟମନ୍ତ୍ରୀ ଘୋଷଣା କରିଥିଲେ ଯେ ଜୁନ୍‍ ୧୯ରୁ ଏହି କାର୍ଯ୍ୟକ୍ରମ କାର୍ଯ୍ୟକାରୀ ହେଉଥିବା ଅଞ୍ଚଳଗୁଡିକୁ ସେ ଅଚାନକ ଗସ୍ତ କରିବେ ଏବଂ ସମଗ୍ର ରାଜ୍ୟରେ ପଞ୍ଚାୟତିରାଜ ଓ ମ୍ୟୁନିସିପାଲିଟି କର୍ମଚାରୀମାନେ କିଭଳି କାର୍ଯ୍ୟ କରୁଛନ୍ତି, ତାହା ତଦାରଖ କରିବେ। ରାଜ୍ୟର ଗ୍ରାମାଞ୍ଚଳ ଓ ମ୍ୟୁନିସିପାଲିଟିଗୁଡିକରେ ଏପର୍ଯ୍ୟନ୍ତ କେଉଁ କାର୍ଯ୍ୟ କରାଯାଇସାରିଛି ତାହାର ଏକ ତାଲିକା ପ୍ରସ୍ତୁତ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ସମସ୍ତ ସରକାରୀ ଅଧିକାରୀ ଗ୍ରାମାଞ୍ଚଳ ଓ ସହରାଞ୍ଚଳ ଗସ୍ତକରି ବାସ୍ତବ ସ୍ଥିତି ଅନୁଧ୍ୟାନ କରିବା ଏବଂ ଲୋକଙ୍କ ସମସ୍ୟା ବୁଝିବାକୁ ମଧ୍ୟ ସେ ନିର୍ଦ୍ଦେଶ ଦେଇଥିଲେ।