ଲଣ୍ଡନ : ବିଶ୍ୱ ପ୍ରସିଦ୍ଧ ପଦାର୍ଥ ଏବଂ ବିଶ୍ୱତତ୍ତ୍ୱ ବିଜ୍ଞାନୀ ଷ୍ଟିଫେନ୍ ହକିଂଙ୍କ ୭୬ ବର୍ଷ ବୟସରେ ବ୍ରିଟେନର କେମ୍ବ୍ରିଜସ୍ଥିତ ତାଙ୍କ ବାସଭବନରେ ବୁଧବାର ପରଲୋକ ଘଟିଛି । ୧୯୬୩ରେ ମାତ୍ର ୨୧ ବର୍ଷ ବସୟରେ ସେ ଏକ ବରିଳ ରୋଗ ଆମିଓଟ୍ରୋଫିସ୍ ଲାଟେରାଲ ସ୍କେଲେରୋସିସି (ଏଏଲଏସ୍)ରେ ଆକ୍ରାନ୍ତ ହୋଇଥିଲେ। ଏହି ରୋଗରେ ପୀଡ଼ିତ ଥାଇ ଦୀର୍ଘ ୫ ଦଶନ୍ଧି ଧରି ସେ ବିଭିନ୍ନ ଆବିଷ୍କାର କରି ବିଶ୍ୱ ବିଖ୍ୟାତ ହୋଇଥିଲେ । ଷ୍ଟିଫେନ ହକିଂଙ୍କ ପୁଅ ଲୁସି ରୋବର୍ଟ ଏବଂ ତାଙ୍କ ଟିମ୍ ଦେହାନ୍ତର ସୂଚନା ଦେଇଛନ୍ତି ।
ହକିଂ କୃଷ୍ଣ ଗର୍ତ୍ତ (ବ୍ଲାକ୍ ହୋଲ)ର ଅନେକ ରହସ୍ୟ ଉପରୁ ପରଦା ଉଠାଇବାରେ ସଫଳ ହୋଇଥିଲେ । ୧୯୪୨ ଜାନୁଆରୀ ୮ରେ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଇଂଲଣ୍ଡର ଅକ୍ସଫୋର୍ଡରେ ଷ୍ଟିଫେନ ଜନ୍ମଗ୍ରହଣ କରିଥିଲେ । ଗାଲିଲିୟୋଙ୍କ ମୃତ୍ୟୁର ଠିକ୍ ୩୦୦ ବର୍ଷ ପରେ ହକିଂ ଜନ୍ମଗ୍ରହଣ କରିଥିଲେ । ୧୯୮୮ରେ ସେ ତାଙ୍କ ପୁସ୍ତକ ‘ଏ ବ୍ରିଫ ହିଷ୍ଟ୍ରି ଅଫ ଟାଇମ ; ଫର୍ମ ଦ ବିଗ ବ୍ୟାଙ୍ଗ ଟୁ ବ୍ଲାକ୍ ହୋଲ୍ସ’ ପାଇଁ ଚର୍ଚ୍ଚାକୁ ଆସିଥିଲେ । ଏହାପରେ ବିଶ୍ୱତତ୍ତ୍ୱ ବା ବିଶ୍ୱ ସୃଷ୍ଟି ନେଇ ପ୍ରକାଶିତ ତାଙ୍କ ପୁସ୍ତକ ୧ କୋଟିରୁ ଅଧିକ ବିକ୍ରି ହେବାରେ ରେକର୍ଡ ସୃଷ୍ଟି କରିଥିଲା ।
ଏଏଲଏସ୍ ରୋଗରେ ଆକ୍ରାନ୍ତ ଲୋକ ମାତ୍ର ୨ରୁ ୫ ବର୍ଷ ପର୍ଯ୍ୟନ୍ତ ବଞ୍ଚୁଥିଲାବେଳେ ଷ୍ଟିଫେନ୍ ୫ ଦଶନ୍ଧି ଧରି ଜୀବିତ ରହିଥିଲେ । ଏହି ରୋଗରେ ପଡ଼ିବା ପରଠାରୁ ସେ ଚଲାବୁଲା କରିପାରୁନଥିଲେ । ଫଳରେ ଏକ ହ୍ୱିଲ୍ ଚେୟାର ଯୋଗେ ସେ ଯାତାୟତ କରୁଥିଲେ । ସେ ଏହି ରୋଗରେ ପୀଡ଼ିତ ଥାଇ ନିଜ ପାଠପଢା ଶେଷ କରିଥିଲେ ଓ ଆବିଷ୍କାରରେ ବିଶ୍ୱକୁ ଚକିତ କରାଇଥିଲେ ।
ଷ୍ଟିଫେନ ଜୀବନ କାଳରେ ୧୩ଟି ସମ୍ମାନଜନକ ଆୱାର୍ଡ ପାଇଥିଲେ । ଷ୍ଟିଫେନଙ୍କୁ ୧୯୮୨ରେ ସିବିଇ ସମ୍ମାନ, ୧୯୮୮ରେ ଓଲ୍ଫ ପାଇଣ୍ଡେସନ ସମ୍ମାନ,୧୯୮୯ରେ କମ୍ପାନିଅନ ସମ୍ମାନ, ୨୦୦୬ରେ କୋପଲେ ମେଡାଲ, ୨୦୦୯ରେ ପ୍ରେସିଡେଣ୍ଟାଲ ମେଡାଲ ଅଫ ପ୍ରିଡମ, ୨୦୧୩ରେ ଫଣ୍ଡାମେଣ୍ଟାଲ ଫିଜିକ୍ସ ସମ୍ମାନରେ ସମ୍ମାନିତ କରାଯାଇଥିଲା ।