ମାଲକାନାଗିରି : ସୁକ୍ମାରେ ସହିଦ ଯବାନଙ୍କୁ ବୁଧବାର ସକାଳେ ଶେଷ ଶ୍ରଦ୍ଧାଞ୍ଜଳି ଦିଆଯାଇଛି । ମଙ୍ଗଳବାର ବିଳମ୍ବିତ ରାତିରେ ରାୟପୁର ଆମ୍ବେଦକର ଡାକ୍ତରଖାନାରେ ବ୍ୟବଚ୍ଛେଦ ପରେ ବୁଧବାର ସକାଳେ ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଦିଆଯାଇଛି ।
ଯବାନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ କେନ୍ଦ୍ରୀୟ ରାଷ୍ଟ୍ର ମନ୍ତ୍ରୀ ହଂସରାଜ ଗଙ୍ଗାରାମ ଅହିର ବିଳମ୍ବିତ ରାତିରେ ରାୟପୁରରେ ପହଞ୍ଚିଥିଲେ । ସକାଳ ପ୍ରାୟ ୬ଟା ବେଳେ ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଦେବା କାର୍ଯ୍ୟକ୍ରମ ଆରମ୍ଭ ହୋଇଥିଲା । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ରମଣ ସିଂହ, କେନ୍ଦ୍ରୀୟ ରାଷ୍ଟ୍ର ମନ୍ତ୍ରୀ ଅହିରଙ୍କ ସହ ଛତିଶଗଡ଼ର ଅନେକ ମନ୍ତ୍ରୀ ଉପସ୍ଥିିତ ରହିଥିଲେ ।
ଏହି ଅବସରରେ ଛତିଶଗଡ଼ ମୁଖ୍ୟମନ୍ତ୍ରୀ ରମଣ ସିଂହ କହିଥିଲେ ଯେ ଏଭଳି ଘଟଣା ଆମ ଯବାନଙ୍କ ମନୋବଳ ଦୁର୍ବଳ କରିପାରିବ ନାହିଁ । ମାଓବାଦୀମାନେ ଏବେ ଆତଙ୍କିତ ହୋଇପଡିଛନ୍ତି । ସେମାନେ ଗୋଟିଏ କୋଣରେ ବନ୍ଦୀ ହୋଇଯାଇଛନ୍ତି। ମାଓବାଦୀଙ୍କ ମୂଳୋତ୍ପାଟନ ପାଇଁ ଆମେ ପ୍ରତିଜ୍ଞା ନେଉଛି ଓ ତାକୁ ପୂରଣ କରିବୁ ।
ପ୍ରକାଶ ଯେ ମଙ୍ଗଳବାର ସୁକ୍ମାର ପୋଲଡିଆ-କିତ୍ସାରାମ ରାସ୍ତାରେ ମାଓବାଦୀଙ୍କ ଲ୍ୟାଣ୍ଡ ମାଇନ ବିସ୍ଫୋରଣ ପରେ ଆଖିବୁଜା ଗୁଳି ମାଡ଼ରେ ୯ ଜଣ ଯବାନ ସହିିଦ ହୋଇଛନ୍ତି । ଏବେ ବି ୬ ଯବାନ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି ।
