ରାଜ୍ୟରେ ଆସନ୍ତା ୧୯ରୁ ଦଶମ ଓ ଦ୍ୱାଦଶ ଶ୍ରେଣୀ ବନ୍ଦ ରହିବା ଓ ସମସ୍ତ ପରୀକ୍ଷା ବନ୍ଦ ରଖିବା ନେଇ ଘୋଷଣା ପରେ ଆଜି ଉଚ୍ଚଶିକ୍ଷା ବିଭାଗ ପକ୍ଷରୁ ସେହିଦିନରୁ ସମସ୍ତ ବିଶ୍ୱବିଦ୍ୟାଳୟ ଓ ଉଚ୍ଚଶିକ୍ଷାନୁଷ୍ଠାନ ବନ୍ଦ ରଖିବା ନେଇ ବିଧିବଦ୍ଧ ନିର୍ଦ୍ଦେଶନାମା ଜାରି କରିଛି। ଏହି ନିର୍ଦ୍ଦେଶନାମା ଅନୁଯାୟୀ ରାଜ୍ୟର ସମସ୍ତ ବିଶ୍ୱବିଦ୍ୟାଳୟ ଓ ସରକାରୀ, ବେସରକାରୀ, ଘରୋଇ ଓ ଅନୁଦାନ ତଥା ଅଣ-ଅନୁଦାନ ପ୍ରାପ୍ତ ମହାବିଦ୍ୟାଳୟ ଅଧ୍ୟକ୍ଷମାନଙ୍କୁ ଅବଗତ କରାଯାଇଛି। ଏପ୍ରିଲ ୧୯ରୁ ସମସ୍ତ ଥିଓରୀ ଓ ପ୍ରାକ୍ଟିକାଲ କ୍ଲାସ ବନ୍ଦ ରହିବା ସହ ସମସ୍ତ ପରୀକ୍ଷାକୁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ପରବର୍ତ୍ତୀ ସମୟରେ କରୋନା ସଂକ୍ରମଣ ପ୍ରଭାବ ହ୍ରାସ ହେଲେ ନୂଆ ପରୀକ୍ଷା ସୂଚୀ ପ୍ରକାଶ ପାଇବ।
— ଉଚ୍ଚଶିକ୍ଷା ବିଭାଗ, ଓଡିଶା ସରକାର ?? (@DHE_Odisha) April 16, 2021
ଏହି ନିର୍ଦ୍ଦେଶନାମାରେ ଆସନ୍ତା ୧୯ ତାରିଖ ସୁଦ୍ଧା ସମସ୍ତ ହଷ୍ଟେଲ ବନ୍ଦ ରଖିବା ସହ ଅନ୍ତେବାସୀମାନଙ୍କୁ ହଷ୍ଟେଲ ଖାଲି କରିବା ପାଇଁ କୁହାଯାଇଛି। ଅନ୍ୟ ପକ୍ଷରେ ବିଶ୍ୱବିଦ୍ୟାଳୟ ଓ କଲେଜଗୁଡିକୁ ୫୦ ପ୍ରତିଶତ କର୍ମଚାରୀ ଆସିବେ। ସମ୍ପୃକ୍ତ ଅନୁଷ୍ଠାନ ମୁଖ୍ୟ କର୍ମଚାରୀଙ୍କ ସହ ପରାମର୍ଶ କରି ରୋଟେସନ ଭିତ୍ତିରେ କର୍ମଚାରୀମାନଙ୍କୁ ଶିକ୍ଷାନୁଷ୍ଠାନକୁ ଆସିବାକୁ ଅନୁମତି ଦେବେ। ରୋଷ୍ଟର ଡ୍ୟୁଟି ଅନୁଯାୟୀ ଅଧ୍ୟାପକ/ଅଧ୍ୟାପିକାମାନେ ନିଜ ଘରୁ କିମ୍ବା କଲେଜରୁ ଅନଲାଇନ ମାଧ୍ୟମରେ ପିଲାମାନଙ୍କୁ ଶିକ୍ଷାଦାନ କରିବେ ଓ କୋର୍ସ ସମାପ୍ତ କରିବେ।
ତେବେ ଯେଉଁ ଉଚ୍ଚଶିକ୍ଷାନୁଷ୍ଠାନ ସ୍ୱାସ୍ଥ୍ୟ ତଥା ମେଡିକାଲ ସମ୍ବନ୍ଧୀୟ ଶିକ୍ଷାଦାନ କରୁଥିବେ, ସେମାନଙ୍କ ପାଇଁ ଏହି ନିର୍ଦ୍ଦେଶାବଳୀ ଲାଗୁ ହେବ ନାହିଁ। ସେଭଳି ଶିକ୍ଷାନୁଷ୍ଠାନ ପାଇଁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅଲଗା ନିର୍ଦ୍ଦେଶାବଳୀ ଜାରି କରିବେ।
Comments are closed.