ନୂଆଦିଲ୍ଲୀ : ଆସାମ ଭଳି ଅନ୍ୟ ରାଜ୍ୟଗୁଡିକରେ ମଧ୍ୟ ଜାତୀୟ ନାଗରିକ ପଞ୍ଜିକା (ଏନ୍ଆର୍ସି) ଆସିପାରେ ବୋଲି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା ପରୋକ୍ଷରେ ସଙ୍କେତ ଦେଇଛନ୍ତି। ଆସାମରେ ଏନ୍ଆର୍ସି ପ୍ରକ୍ରିୟା ଶେଷ ହେବା ପରେ କେବେ ଏବଂ ଦେଶର ଅନ୍ୟ କେଉଁ ଅଞ୍ଚଳରେ ଏହି ପ୍ରକ୍ରିୟା ଆରମ୍ଭ ହେବ ତାହା କେନ୍ଦ୍ର ସରକାର ସ୍ଥିର କରିବେ। ଏନ୍ଆର୍ସି ଚିଠାପ୍ରସ୍ତାବକୁ ନେଇ ସୃଷ୍ଟ ବିବାଦ ପରିପ୍ରେକ୍ଷୀରେ ଶାହା ନ୍ୟୁଜ୍୧୮ର ‘ବୈଠକ’ କାର୍ଯ୍ୟକ୍ରମରେ ଏହା କହିଛନ୍ତି। ସେ କହିଛନ୍ତି ଆସାମ ଏନ୍ଆର୍ସି ଅନୁସାରେ ୪୦ ଲକ୍ଷ ଲୋକ ରାଜ୍ୟରେ ଅନୁପ୍ରବେଶ କରିଛନ୍ତି। ସେମାନଙ୍କର ମତଦାନ କରିବାର ଅଧିକାର ନାହିଁ। ନିଜର ନାଗରିକତ୍ୱ ପ୍ରମାଣ କରିବାକୁ ସେମାନଙ୍କୁ ସମସ୍ତ ସୁଯୋଗ ପ୍ରଦାନ କରାଯିବ; କିନ୍ତୁ ଯେଉଁମାନେ ଏଥିରେ ବିଫଳ ହେବେ ଦେଶର ଗଣତାନ୍ତ୍ରିକ ପ୍ରକ୍ରିୟାରେ ଅଂଶଗ୍ରହଣ କରିବା ନେଇ ସେମାନଙ୍କର କୌଣସି ଅଧିକାର ରହିବ ନାହିଁ। ତେବେ ଦେଶରେ ବେଆଇନ ଭାବେ ବାସ କରୁଥିବା ଲୋକଙ୍କୁ ନିର୍ବାସିତ କରାଯିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି। କଂଗ୍ରେସକୁ ସମାଲୋଚନା କରି ସେ କହିଛନ୍ତି ପୂର୍ବତନ ପ୍ରଧାନମନ୍ତ୍ରୀ ରାଜିବ ଗାନ୍ଧୀଙ୍କ ସମୟରେ ଆସାମ ରାଜିନାମା ସ୍ୱାକ୍ଷର ହୋଇଥିଲା। ରାଜୀବ ହିଁ ବେଆଇନ ଅପ୍ରବାସୀଙ୍କୁ ନିର୍ବାସିତ କରିବାକୁ ନିଷ୍ପତ୍ତି ନେଇଥିଲେ। ଏହାସତ୍ତ୍ବେ କଂଗ୍ରେସ ଏନ୍ଆର୍ସି କାର୍ଯ୍ୟକାରୀ କରିବାର ସାହସ କରିପାରି ନ ଥିଲା। ବିଭିନ୍ନ ରାଜନୈତିକ ଦଳଗୁଡିକ ଏହି ପ୍ରସଙ୍ଗରେ ନିଜ ଆଭିମୁଖ୍ୟ ସ୍ପଷ୍ଟ କରିବା ଉଚିତ ବୋଲି ସେ କହିଛନ୍ତି।
Popular Categories
Previous article
Next article