ଚେନ୍ନଇ : ଦ୍ରାବିଡ଼ ମୁନେତ୍ରା କାଝାଗାମ୍ (ଡିଏମ୍କେ)ର ପ୍ରତିଷ୍ଠାତା, ତାମିଲନାଡ଼ୁର ୫ଥର ମୁଖ୍ୟମନ୍ତ୍ରୀ ତଥା ଜନନେତା, ବିଶିଷ୍ଟ ଲେଖକ ଓ ବିପ୍ଳବୀ କବି, ଚଳଚ୍ଚିତ୍ର ବ୍ୟକ୍ତିତ୍ୱ ମୁଥୁବେଲ(ଏମ୍) କରୁଣାନିଧିଙ୍କ ବୁଧବାର ଅନ୍ତିମ ଯାତ୍ରା ଆରମ୍ଭ ହୋଇଛି। ଏକ ଶୋଭାଯାତ୍ରାରେ ତାଙ୍କ ପାର୍ଥିବ ଶରୀରକୁ ଚେନ୍ନଇର ମାରିନା ବିଚ୍କୁ ନିଆଯାଉଛି। ସେଠାରେ ପ୍ରସିଦ୍ଧ ତାମିଲ ନେତା ତଥା ତାଙ୍କ ରାଜନୈତିକ ଗୁରୁ ପୂର୍ବତନ ମୁଖ୍ୟମନ୍ତ୍ରୀ ଆନ୍ନାଦୁରାଇଙ୍କ ସମାଧି ନିକଟରେ ତାଙ୍କର ଅନ୍ତିମ ସତ୍କାର ହେବ। ଶୋଭାଯାତ୍ରାରେ ଲକ୍ଷାଧିକ ଲୋକଙ୍କ ଭିଡ଼ ଦେଖିବାକୁ ମିଳିଛି। ସମର୍ଥକ, ଦଳୀୟ କାର୍ଯ୍ୟକର୍ତ୍ତା ତାଙ୍କ ଶେଷ ଦର୍ଶନ ପାଇଁ ଛୁଟି ଆସିଛନ୍ତି। ଜନ ସମୁଦ୍ର ମଧ୍ୟରେ ତାଙ୍କୁ ସମୁଦ୍ର ତଟକୁ ନିଆଯାଉଛି। ପ୍ରଧାନମନ୍ତ୍ରୀ, ତାମିଲନାଡୁ ମୁଖ୍ୟମନ୍ତ୍ରୀ, ବିରୋଧୀ ଦଳ ମୁଖ୍ୟଙ୍କ ସମେତ ବହୁ ବରିଷ୍ଠ ନେତା ଦଳଗତ ନିର୍ବିଶେଷରେ ତାଙ୍କ ଶେଷ ଦର୍ଶନ କରି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। କରୁଣାନିଧିଙ୍କ ମୃତ୍ୟୁରେ ତାମିଲନାଡୁରେ ଏକ ପ୍ରକାର ଶୋକର ଛାୟା ଖେଳିଯାଇଛି।
ଉଲ୍ଲେଖ ଯେ ମଙ୍ଗଳବାର ସନ୍ଧ୍ୟା ପ୍ରାୟ ୬ଟା ୧୦ମିନିଟ୍ରେ ସ୍ଥାନୀୟ କାବେରୀ ହସ୍ପିଟାଲରେ ୯୪ବର୍ଷ ବୟସରେ କରୁଣାନିଧିଙ୍କ ପରଲୋକ ହୋଇଥିଲା। ପ୍ରାୟ ଦୁଇ ବର୍ଷ ହେଲା ସେ ବାର୍ଦ୍ଧକ୍ୟଜନିତ ସମସ୍ୟାରେ ଗତି କରୁଥିଲେ। ଡାକ୍ତରଖାନା ବ୍ୟତୀତ ଘରୁ ବାହାରୁ ନଥିଲେ। ଶେଷରେ ମଙ୍ଗଳବାର ସନ୍ଧ୍ୟାରେ ଶେଷ ନିଶ୍ୱାସ ତ୍ୟାଗ କରିଥିଲେ। ତାଙ୍କ ମୃତ୍ୟୁରେ ଗୋଟିଏ ଯୁଗର ଅବସାନ ଘଟିଛି। ସମଗ୍ର ତାମିଲନାଡ଼ୁରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଛି। ତାଙ୍କ ମୃତ୍ୟୁରେ ରାଷ୍ଟ୍ରୀୟ ଶୋକବ୍ୟକ୍ତ କରାଯାଇଛି ଓ ତାମିଲନାଡୁ ରାଜ୍ୟ ସରକାର ୭ଦିନିଆ ଶୋକ ଘୋଷଣା କରିଛନ୍ତି। ଏହା ସହିତ ବୁଧବାର ପାଇଁ ରାଜ୍ୟରେ ସରକାରୀ ଛୁଟି ଘୋଷଣା କରାଯାଇଛି।
କରୁଣାନିଧିଙ୍କ ଅନ୍ତିମ ଯାତ୍ରା ଅପରାହ୍ନ ୪ଟାରେ ରାଜାଜୀ ହଲରୁ ଆରମ୍ଭ ହୋଇଛି। ଆନ୍ନା ମେମୋରିଆଲଠାରେ ତାଙ୍କର ଅନ୍ତିମ ସତ୍କାର ହେବ। ତାଙ୍କ ମୃତ୍ୟୁରେ ଉପା ଅଧ୍ୟକ୍ଷା ତଥା କଂଗ୍ରେସ ନେତା ସୋନିଆ ଗାନ୍ଧି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଜାମ୍ମୁ କାଶ୍ମୀର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା, ଏନ୍ସିପି ମୁଖ୍ୟ ଶରଦ ପାୱାର, କଂଗ୍ରେସ ନେତା ପ୍ରଫୁଲ୍ଲ ପଟେଲ, ଟିଏମ୍ସି ନେତ୍ରୀ ମମତା ବାନାର୍ଜୀ ପ୍ରମୁଖ ଗଭୀର ଶୋକ ବ୍ୟକ୍ତ କରିଛନ୍ତି। ସେହିପରି ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରୁଣାନିଧିଙ୍କ ପୁଅ ଷ୍ଟାଲିନ୍ଙ୍କୁ ଫୋନ୍ କରି ଶୋକ ବ୍ୟକ୍ତ କରିବା ସହ ସମବେଦନା ଜଣାଇଛନ୍ତି।
ଅନ୍ତିମ ଯାତ୍ରାରେ କରୁଣାନିଧି
Popular Categories
Previous article
Next article