ଚେନ୍ନଇ : ତାମିଲନାଡୁର ଥେନି ଜିଲା କୁରେଙ୍ଗିନି ଜଙ୍ଗଲରେ ରବିବାର ବଡ ଧରଣର ନିଆଁ ଲାଗିଥିବାବେଳେ ସେଠାକୁ ଟ୍ରେକିଂ (ପର୍ବତାରୋହଣ) ପାଇଁ ଯାଇଥିବା ୪ ଜଣ ଛାତ୍ର ଜୀବନ୍ତ ଦଗ୍ଧ ହୋଇଯାଇଛନ୍ତି । ଟ୍ରେକିଂ ପାଇଁ ଯାଇଥିବା ଛାତ୍ରଙ୍କ ମଧ୍ୟରୁ ୧୨ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ଏମାନଙ୍କ ବ୍ୟତୀତ ଅନେକ ଛାତ୍ର ନିଅାଁ ମଧ୍ୟରେ ଫସିରହିଥିବା ଜଣାଯାଇଛି।
ଜଙ୍ଗଲ ନିଆଁରେ ଫସିଥିବା ଛାତ୍ରଙ୍କୁ ଉଦ୍ଧାର କରିବା ପାଇଁ ମୁଖ୍ୟମନ୍ତ୍ରୀ ଇ ପଲାନିସ୍ୱାମୀ ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣଙ୍କ ସହାୟତା ଲୋଡିଛନ୍ତି। ନିଆଁ ମଧ୍ୟରେ ଫସିଥିବା ଛାତ୍ରଙ୍କୁ ଉଦ୍ଧାର କରିବା ପାଇଁ ପ୍ରତିରକ୍ଷା ମନ୍ତ୍ରୀ ବାୟୁସେନାକୁ ନିର୍ଦେଶ ଦେଇଛନ୍ତି। ନିର୍ଦେଶକ୍ରମେ ବାୟୁସେନାର ନଦର୍ଣ୍ଣ କମାଣ୍ଡ ଉଦ୍ଧାର କାର୍ଯ୍ୟ କରିଛି। ଏହା ସହିତ ରାଜ୍ୟ ସରକାରଙ୍କ ଅଗ୍ନିଶମ ବିଭାଗ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛି।
ରାତି ଅନ୍ଧାର ଯୋଗୁଁ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇଛି । ଉପମୁଖ୍ୟମନ୍ତ୍ରୀ ଓ ପନିରସେଲଭମ୍ ଘଟଣାସ୍ଥଳରେ ପହଞ୍ଚିଛନ୍ତି। ଛାତ୍ରମାନେ ପର୍ବତାରୋହଣ ଉଦ୍ଦେଶ୍ୟରେ ଯାଇଥିବାବେଳେ ନିଆଁରେ ଫସିଯାଇଥିଲେ। ସେମାନେ ଏ ସମ୍ପର୍କରେ ଆମ୍ବୁଲାନ୍ସକୁ ସୂଚନା ଦେଇଥିଲେ।