ଭୁବନେଶ୍ବର: ରାଜଧାନୀରେ ଜଣେ ନାବାଳିକାଙ୍କୁ ଗଣ ଦୁଷ୍କର୍ମ ଅଭିଯୋଗ ଘଟଣାରେ ପୁଲିସ କମିଶନରଙ୍କୁ ରିପୋର୍ଟ ତଲବ କରିଛନ୍ତି ରାଜ୍ୟ ମହିଳା କମିଶନ ଓ ଶିଶୁ ଅଧିକାର ସୁରକ୍ଷା ଆୟୋଗ । ଘଟଣା ଘଟିବାର ଏକ ସପ୍ତାହ ବିତି ଯାଇଥିଲେ ମଧ୍ୟ ଏ ସମ୍ପର୍କରେ ପୁଲିସ ଯଥୋଚିତ ତତ୍ପରତା ପ୍ରଦର୍ଶନ କରି ନ ଥିବା ନେଇ ଉଭୟ ଅଭିଯୋଗ କରିବା ସହ ତୁରନ୍ତ ରିପୋର୍ଟ ଦେବାକୁ ନିର୍ଦେଶ ଦେଇଛନ୍ତି । ଓଡ଼ିଶା ଶିଶୁ ଅଧିକାର ସୁରକ୍ଷା ଆୟୋଗ କମିଶନର ସନ୍ଧ୍ୟାବତୀ ପ୍ରଧାନ ଓ ମହିଳା କମିଶନ ଅଧ୍ୟକ୍ଷା ଡ଼. ମିନତୀ ବେହେରା ଏ ସମ୍ପର୍କରେ ପୁଲିସ କମିଶନରଙ୍କୁ ଭିନ୍ନଭିନ୍ନ ଚିଠି ଲେଖିଥିବା ସୂଚନା ମିଳିଛି । ଏପରିକି ଏ କ୍ଷେତ୍ରରେ ତୁରନ୍ତ ପଦକ୍ଷେପ ନ ନେଲେ ଶିଶୁ ଅଧିକାର ସୁରକ୍ଷା ଆୟୋଗ ନିଜ ଆଡ଼ୁ ତଦନ୍ତ କରିବ ବୋଲି ମଧ୍ୟ ସୂଚାଇ ଦେଇଛନ୍ତି ।
ଗତ ମାର୍ଚ ଓ ଏପ୍ରିଲ ମାସରେ ନାବାଳିକାଙ୍କୁ କିଛି ପୁଲିସ କର୍ମୀ, ତାଙ୍କର ସହଯୋଗୀ ବାରମ୍ବାର ଗଣଦୁଷ୍କର୍ମ କରିଥିବା ନେଇ ଅଗଷ୍ଟ ୩୦ ତାରିଖରେ ତାଙ୍କର ମା’ ଅଭିଯୋଗ କରିଥିଲେ । ଏହାପରେ ଏହି ପ୍ରସଙ୍ଗ ଚର୍ଚାର ପରିଧିକୁ ଆସିଥିଲା । ଇତିମଧ୍ୟରେ ଗୋଟିଏ ସପ୍ତାହ ବିତି ଯାଇଥିଲେ ମଧ୍ୟ ପୁଲିସ ସେପରି ଆଖିଦୃଶିଆ ପଦକ୍ଷେପ ଗ୍ରହଣ କରି ଥିବା ନେଇ ଅଭିଯୋଗ ହୋଇଛି ।
ଏହି ଘଟଣାରେ କିଛି ପୁଲିସ କର୍ମଚାରୀଙ୍କ ସହ ଗଣମାଧ୍ୟମ ସହ ସଂପୃକ୍ତ ଦୁଇଜଣ ବ୍ୟକ୍ତି ଜଡ଼ିତ ଥିବା ମଧ୍ୟ ଅଭିଯୋଗ ହୋଇଛି। ପୁଲିସ ଏହି ମାମଲାରେ ଭାରତୀୟ ଦଣ୍ଡବିଧି ଆଇନର ବିଭିନ୍ନ ଧାରା ଓ ପୋକ୍ସୋ ଆଇନରେ ମାମଲା ରୁଜୁ କରିଛି । କମିଶନର ପୁଲିସ ଇତିମଧ୍ୟରେ ନାବାଳିକାଙ୍କ ବୟାନ ରେକର୍ଡ଼ କରିଛି ଏବଂ ସେ ପୁଲିସ କର୍ମଚାରୀ ଓ ତାଙ୍କ ସହଯୋଗୀଙ୍କ ନାଁ ଉଲ୍ଲେଖ କରିଛନ୍ତି । ଏହି ପ୍ରସଙ୍ଗରେ ମହିଳା କମିଶନ ଡ଼. ମିନତୀ ବେହେରା କହିଛନ୍ତି ଯେ ଘଟଣାର ତଦନ୍ତ ଧାରା ଉପରେ କମିଶନ ପୁରା ନଜର ରଖିଛନ୍ତି, ଆବଶ୍ୟକ ପଡ଼ିଲେ ଏ ନେଇ ପୁଲିସ ମହାନିର୍ଦେଶକଙ୍କ ସହ ଆଲୋଚନା କରାଯିବ।
ଅନ୍ୟପକ୍ଷରେ ଭୁବନେଶ୍ବର ଡ଼ିସିିପି ଘଟଣାର ଗୁରୁତ୍ବ ଦୃଷ୍ଟିରୁ ତଦନ୍ତ ନିମନ୍ତେ ଏକ ତଦନ୍ତକାରୀ ଦଳ ଗଠନ କରାଯାଇଥିବା ଏବଂ ଆଇସିଡ଼ବ୍ଲ୍ୟୁକୁ ତଦନ୍ତ ଦାୟିତ୍ବ ଦିଆଯାଇଥିବା ସୂଚନା ଦେଇଛନ୍ତି ।
