ମିଜୋରାମ ଚମ୍ପାଇ ଜିଲ୍ଲାର ଭୂକମ୍ପ ପ୍ରଭାବିତ ଅଞ୍ଚଳ ପରିଦର୍ଶନ କରୁଥିବା ବେଳେ ସେଠାକାର ବିଧାୟକ ଜେଡଆର ଥାଇମସାଙ୍ଗା ଏକ ଜରୁରୀକାଳୀନ ସିଜରିଆନ (ପ୍ରସବ ଜନିତ ଅପରେସନ) କରି ଜଣେ ମହିଳାଙ୍କୁ ମୃତ୍ୟୁ ମୁଖରୁ ବଞ୍ଚାଇବା ପରେ ଏବେ ସାମାଜିକ ଗଣମାଧ୍ୟମରେ ଲୋକମାନେ ତାଙ୍କୁ ଶୁଭେଚ୍ଛା ଜଣାଇବାରେ ଲାଗିଛନ୍ତି। ମହିଳାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେଉଥିବା ବେଳେ କୌଣସି ଡାକ୍ତର ନ ଥିବାରୁ ବିଧାୟକ ଥାଇମସାଙ୍ଗା ଚିକିତ୍ସା କରିଥିଲେ।
ବିଧାୟକ ଥାଇମସାଙ୍ଗା ବୃତ୍ତିରେ ଜଣେ ଡାକ୍ତର ଓ ସେ ପ୍ରସୂତି ଏବଂ ସ୍ତ୍ରୀ ରୋଗ ବିଶେଷଜ୍ଞ। ଅନେକ ସମୟରେ ମିଜୋରାମର ଦୁର୍ଗମ ଅଞ୍ଚଳରେ ଜରୁରୀକାଳୀନ ଚିକିତ୍ସା ସେବା ଯୋଗାଇ ଦେବା ପାଇଁ ସେ କାର୍ଯ୍ୟ କରିଥାନ୍ତି।
ଗତ ସୋମବାର ଦିନ ବିଧାୟକ ଥାଇମସାଙ୍ଗା ମିଆଁମାର ସୀମା ନିକଟରେ ଥିବା ତାଙ୍କ ନିର୍ବାଚନମଣ୍ଡଳୀ ଉତ୍ତର ଚମ୍ପାଇ ଗସ୍ତରେ ଯାଇ ଭୂକମ୍ପରେ ହୋଇଥିବା କ୍ଷୟକ୍ଷତିର ଆକଳନ କରିବା ସହ କୋଭିଡ -୧୯ ପରିସ୍ଥିତିର ଆକଳନ କରିଥିଲେ। ସେହି ସମୟରେ ନାଗୁର ଗାଁର ୩୮ ବର୍ଷୀୟ ସି ଲାଲହମଙ୍ଗାଇସଙ୍ଗି ଦ୍ଵିତୀୟ ସନ୍ତାନ ପ୍ରସବ ଯନ୍ତ୍ରଣାରେ ଛଟପଟ ହେଉଥିଲେ ଓ ତାଙ୍କର ପ୍ରଚୁର ରକ୍ତସ୍ରାବ ହେଉଥିଲା। ସେହିଦିନ ସ୍ୱାସ୍ଥ୍ୟ ସମସ୍ୟା ହେତୁ ଚମ୍ପାଇ ଡାକ୍ତରଖାନାର ଅଧିକାରୀ ଛୁଟିରେ ଥିଲେ ଏବଂ ସେହି ଆସନ୍ନ ପ୍ରସବା ମହିଳା ଜଣଙ୍କ ୨୦୦ କିଲୋମିଟର ଦୂରରେ ଥିବା ଆଇଜଲକୁ ଯାତ୍ରା କରିବା ସ୍ଥିତିରେ ନଥିଲେ।
ବିଧାୟକ ଥାଇମସାଙ୍ଗା କହିଛନ୍ତି ଯେ ଯେତେବେଳେ ମହିଳାଙ୍କ ଅବସ୍ଥା ବିଷୟରେ ତାଙ୍କୁ ଅବଗତ କରାଗଲା, ସେ ସଙ୍ଗେ ସଙ୍ଗେ ଡାକ୍ତରଖାନାକୁ ଯାଇ ଜରୁରୀକାଳୀନ ଅପରେସନ କରିଥିଲେ। ଏବେ ଉଭୟ ମା’ ଏବଂ ଶିଶୁ ଭଲ ଅଛନ୍ତି ବୋଲି ସେ କହିଛନ୍ତି। ଆବଶ୍ୟକ କରୁଥିବା ଲୋକଙ୍କୁ ସାହାଯ୍ୟ କରିବା ତାଙ୍କର ଦାୟିତ୍ୱ ବୋଲି ସେ କହିଛନ୍ତି। ସେ ବର୍ତ୍ତମାନ ରାଜ୍ୟ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବୋର୍ଡର ଉପାଧ୍ୟକ୍ଷ ଅଛନ୍ତି।
