ଭାରତରେ ୧୪ ହଜାର ଟପିଲା କରୋନା ମୃତ୍ୟୁ ସଂଖ୍ୟା, ୪.୪ ଲକ୍ଷରୁ ଊର୍ଦ୍ଧ୍ଵ ଆକ୍ରାନ୍ତ

ନୂଆଦିଲ୍ଲୀ: ଭାରତରେ କରୋନା ମୃତ୍ୟୁ ସଂଖ୍ୟା ୧୪ ହଜାର ଅତିକ୍ରମ କରିଛି। ମଙ୍ଗଳବାର ସକାଳ ସୁଦ୍ଧା ଦେଶରେ ମୋଟ ୧୪ ହଜାର ୧୧ ଜଣ ଏହି ମହାମାରୀ ଭୂତାଣୁରେ ପ୍ରାଣ ହରାଇଛନ୍ତି। ଗତ ୨୪ ଘଣ୍ଟାରେ ୩୧୨ ଜଣଙ୍କ ମୃତ୍ୟୁ ଘଟିଥିବାବେଳେ ୧୪ ହଜାର ୯୩୨ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି। ଫଳରେ ମୋଟ ସଂକ୍ରମିତଙ୍କ ସଂଖ୍ୟା ୪ ଲକ୍ଷ ୪୦ ହଜାର ୨୧୪କୁ ବୃଦ୍ଧି ପାଇଛି। ବର୍ତ୍ତମାନ ୧ ଲକ୍ଷ ୭୮ହଜାର ୧୪ ରୋଗୀ ସକ୍ରିୟ ଥିବାବେଳେ ୨ ଲକ୍ଷ ୪୮ ହଜାର ୧୯୦ ଜଣ ସୁସ୍ଥ ହୋଇଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।

ମହାରାଷ୍ଟ୍ରରେ କରୋନା ଆକ୍ରାନ୍ତଙ୍କ ସଂଖ୍ୟା ୧ ଲକ୍ଷ ୩୫ ହଜାର ୭୯୬ରେ ପହଞ୍ଚିଥିବାବେଳେ ସର୍ବାଧିକ ୬୨୮୩ ଜଣଙ୍କ ମୃତ୍ୟୁ ଘଟିଛି। ଦିଲ୍ଲୀରେ ୬୨ ହଜାର ୬୫୫ ଜଣ କରୋନାରେ ଆକ୍ରାନ୍ତ ହୋଇଥିବାବେଳେ ୨୨୩୩ ଜଣ ପ୍ରାଣ ହରାଇଛନ୍ତି। ଏହାବ୍ୟତୀତ ତାମିଲନାଡୁରେ ୬୨ ହଜାର ୮୭ କରୋନା ସଂକ୍ରମିତ ଏବଂ ୭୯୪ ରୋଗୀଙ୍କ ମୃତ୍ୟୁ ଘଟିଛି। ଗୁଜରାଟରେ ସଂକ୍ରମିତ ସଂଖ୍ୟା ୨୭ ହଜାର ୮୮୦କୁ ବୃଦ୍ଧି, ୧୬୮୫ ଜଣଙ୍କ ମୃତ୍ୟୁ ହୋଇଛି। ସେହିପରି ଉତ୍ତରପ୍ରଦେଶରେ ୧୮ ହଜାର ୩୨୨ ସଂକ୍ରମିତ ଓ ୫୬୯ ମୃତ, ପଶ୍ଚିମବଙ୍ଗରେ ୧୪ହଜାର ୩୫୮ ଆକ୍ରାନ୍ତ ଓ ୫୬୯ ମୃତ, ହରିୟାଣାରେ ୧୧ ହଜାର ୨୫ ଆକ୍ରାନ୍ତ ଏବଂ ୧୬୯ ମୃତ, ଆନ୍ଧ୍ରପ୍ରଦଶେରେ ୯୩୭୨ ଆକ୍ରାନ୍ତ ଏବଂ ୧୧୧ ମୃତ, ତେଲେଙ୍ଗାନାରେ ୮୬୭୪ ସଂକ୍ରମିତ ଓ ୨୧୭ ମୃତ, କର୍ଣ୍ଣାଟକରେ ୯୩୯୯ ଆକ୍ରାନ୍ତ ଓ ୧୪୨ ମୃତ, ରାଜସ୍ଥାନରେ ୧୫ ହଜାର୨୩୨ ଆକ୍ରାନ୍ତ ଓ ୩୫୬ ମୃତ, ଜାମ୍ମୁ-କାଶ୍ମୀରରେ ୬୦୮୮ ସଂକ୍ରମିତ ଓ ୮୫ ମୃତ, ମଧ୍ୟପ୍ରଦେଶରେ ୧୨ ହଜାର ୭୮ ସଂକ୍ରମିତ ଓ ୫୨୧ ମୃତ, ବିହାରରେ ୭୮୯୩ ଆକ୍ରାନ୍ତ ଓ ୫୨ ମୃତ, ଆସାମରେ ୫୮୫୩ ଆକ୍ରାନ୍ତ ଓ ୯ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି।