ଭୁବନେଶ୍ବର: ଆଜିକାଲି ଚାଲିଛି ଅନଲାଇନ କାରବାର । ଲୁଗାପଟାଠାରୁ ଆରମ୍ଭ କରି ବିଭିନ୍ନ ବୈଦ୍ୟୁତିକ ସାମଗ୍ରୀ, ଏପରିକି ଏବେ ମଦ ବି ହୋମ୍ ଡ଼େଲିଭରୀ ହେଲାଣି । ତେଣୁ ଚୋରା ନିଶାବେପାରୀମାନେ ବ୍ରାଉନସୁଗାର ହୋମ୍ ଡ଼େଲିଭରି କରିବା ଆରମ୍ଭ କରିଛନ୍ତି । ମାତ୍ର ବ୍ରାଉନସୁଗାର ହୋମ୍ ଡ଼େଲିଭରି କରିବାକୁ ଆସି ପୁଲିସ ଫାଶରେ ପଡ଼ିଛି ଜଣେ ଅପରାଧୀ । ପୁଲିସ ପ୍ରାୟ ୧୧ ଲକ୍ଷ ଟଙ୍କାର ବ୍ରାଉନସୁଗାର, ଏକ ବନ୍ଧୁକ ଜବତ କରିବା ସହ ତାକୁ ଗିରଫ କରିଛି ।
କଟକ ଅବକାରୀ ଗୁଇନ୍ଦା ବିଭାଗ ଇନ୍ସପେକ୍ଟର ଜଗଦୀଶ ସାମଲଙ୍କ ସୂଚନା ଅନୁସାରେ ଅଭିଯୁକ୍ତ ଜଟଣୀ ଥାନା ଅନ୍ତର୍ଗତ ମୁଣ୍ଡିଆସାହିର ଏସକେ ଫରିଦ୍(୨୬) ଜଣେ ଅଭ୍ୟାସଗତ ଅପରାଧୀ । ନିଶା କାରବାର ତାର ପେଶା । ଖୋର୍ଧା ଅଞ୍ଚଳର ବିଭିନ୍ନ ଥାନାରେ ତା ନାଁରେ ମାମଲା ରହିଛି । ଯୁବବର୍ଗଙ୍କୁ ନିଶା ଫାଶରେ ପକାଇ ସେମାନଙ୍କୁ ଶୋଷଣ କରିବା ତାର ନିୟମିତ ଅଭ୍ୟାସ । ଯେଉଁଠି ଲୋକ ପ୍ରତିବାଦ କରୁଥିଲେ ସେଠାରେ ସେମାନଙ୍କୁ ବନ୍ଧୁକ ଦେଖାଇ ଧମକ ଚମକ ଦେଉଥିଲା । ସେ ନିଶା କାରବାରରେ ଜଡ଼ିତ ଥିବା ବିଶେଷ ସୂତ୍ରରୁ ଖବର ପାଇଥିଲା । ତେଣୁ ତାକୁ ଧରିବା ପାଇଁ ଯୋଜନା ହୋଇଥିଲା ।
ବିଭାଗର ଜଣେ କର୍ମଚାରୀ ଗ୍ରାହକ ସାଜି ତା ସହ ଫୋନରେ ଯୋଗାଯୋଗ କରିଥିଲେ। ଫରିଦ୍ ପ୍ରଥମେ ତା ନିକଟରୁ ଆସି ବ୍ରାଉନସୁଗାର ନେବା ପାଇଁ କହିଥିଲା । ମାତ୍ର ବିଭାଗୀୟ କର୍ମଚାରୀ ଅସୁବିଧା ଯୋଗୁଁ ଯାଇ ପାରିବେ ନାହିଁ ବୋଲି କହିଥିଲେ, ତେଣୁ ଫରିଦ୍ ତାଙ୍କୁ ହୋମଡ଼େଲିଭରି କରିବ ବୋଲି ପ୍ରସ୍ତାବ ଦେଇଥିଲା । ସୂଚନା ଅନୁସାରେ ଫରିଦ ବ୍ରାଉନସୁଗାର ହୋମ ଡ଼େଲିଭରି ଦେବାକୁ ଆସୁଥିବାବେଳେଖୋର୍ଦ୍ଧା-ଜଟଣୀ ବାଇପାସ୍ ଛକରେ ଅବକାରୀ କର୍ମଚାରୀ ତାକୁ କାବୁ କରିଥିଲେ । ତା ନିକଟରୁ ଗୋଟିଏ ବନ୍ଧୁକ, ନଗଦ ୧୨ ହଜାର ଟଙ୍କା ଏବଂ ୧୦୫ ଗ୍ରାମ ବ୍ରାଉନସୁଗର ଜବତ ହୋଇଛି । ଜବତ ବ୍ରାଉନସୁଗରର ମୂଲ୍ୟ ୧୧ ଲକ୍ଷ ହେବ ବୋଲି ଅନୁମାନ କରାଯାଉଛି ।
