ସମାଜ ପୋର୍ଟାଲ ଡେସ୍କ: କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ସାମ୍ବାଦିକମାନଙ୍କ ଉପରେ ଆକ୍ରମଣର ତୀବ୍ର ନିନ୍ଦା କରିଛନ୍ତି। ସେ କହିଛନ୍ତି ଏଭଳି କାର୍ଯ୍ୟ ଏକ ସୁସ୍ଥ ଗଣତନ୍ତ୍ରର ବିରୁଦ୍ଧାଚରଣ କରୁଛି। ଏକ ବେସରକାରୀ ସମ୍ବାଦ ସଂସ୍ଥା ରିପବ୍ଲିକ ଟିଭିର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ୱାମୀଙ୍କ ଉପରେ ଆକ୍ରମଣ ହୋଇଥିବା ଘଟଣା ଉପରେ ସେ କହିଛନ୍ତି ଏ କ୍ଷେତ୍ରରେ ତଦନ୍ତ ଆରମ୍ଭ କରାଯାଇଛି ଓ ଆଇନ୍ ଅନୁସାରେ ପଦକ୍ଷେପ ନିଆଯିବ। ମୁମ୍ବାଇରେ ଅର୍ଣ୍ଣବଙ୍କ ଉପରେ ଗତକାଲି ଆକ୍ରମଣ ହୋଇଥିଲା। ଅର୍ଣ୍ଣବଙ୍କ ପତ୍ନୀଙ୍କ ଉପରେ ମଧ୍ୟ ଆକ୍ରମଣ ହୋଇଥିବା ଜଣାପଡିଛି।
ଏଭଳି ଆକ୍ରମଣକୁ ଗଣତନ୍ତ୍ର ବିରୋଧୀ ବର୍ଣ୍ଣନା କରି ଜାଭଡେକର କହିଛନ୍ତି ଯେ କେନ୍ଦ୍ର ସରକାର ସାମ୍ବାଦିକଙ୍କ ଉପରେ ସବୁ ପ୍ରକାର ଆକ୍ରମଣକୁ ନିନ୍ଦା କରନ୍ତି କାରଣ ତାହା ଏକ ସୁସ୍ଥ ଗଣତନ୍ତ୍ରର ବିରୋଧୀ ଅଟେ। ଏହି ଘଟଣାରେ ଇତିମଧ୍ୟରେ ପୁଲିସ ଦୁଇ ଜଣଙ୍କୁ ଗିରଫ କରିଥିବା ସୂଚନା ମିଳିଛି।
