ଭୁବନେଶ୍ୱର: ଭୁବନେଶ୍ୱର-କଟକ ୧୬ ନମ୍ବର ଜାତୀୟ ରାଜପଥର ପାହାଳ ନିକଟରେ ହୋଇଥିବା ମର୍ମନ୍ତୁଦ ସଡ଼କ ଦୁର୍ଘଟଣାରେ ମୃତ୍ୟୁ ସଂଖ୍ୟା ୩କୁ ବୃଦ୍ଧି ହୋଇଛି। ଗତକାଲି ଘଟଣାସ୍ଥଳରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ସୋମବାର ଅପରାହ୍ନରେ ଆଉ ଜଣଙ୍କ ମୃତ୍ୟୁ ହୋଇଛି। ମୃତକ ମଧ୍ୟରେ ଜଣେ ଶିଶୁ ରହିଥିବା ଜଣାପଡିଛି। ଦୁର୍ଘଟଣାରେ ଆହତ ହୋଇଥିବା ୧୧ ଜଣ ବର୍ତ୍ତମାନ ଚିକିତ୍ସାଧୀନ ଅବସ୍ଥାରେ ରହିଛନ୍ତି।
ସୂଚନାଯୋଗ୍ୟ, ଦୁଇଟି ପରିବାରର ମୋଟ୍ ୧୪ ଜଣ ରବିବାର ତାରିଣୀ ଦର୍ଶନ ସାରି ଫେରୁଥିବା ବେଳେ ପାହାଳ ହାଇହଣ୍ଡା କାର ସୋ ରୁମ ସମ୍ମୁଖରେ ଏକ ଟ୍ରକ ସେମାନଙ୍କ ଟ୍ରାଭେରା ଗାଡିକୁ ପଛରୁ ଧକ୍କା ଦେଇଥିଲା। ଦୁର୍ଘଟଣା ପରେ ଧକ୍କା ଦେଇଥିବା ଟ୍ରକ୍ ଘଟଣାସ୍ଥଳରୁ ଫେରାର ହୋଇଥିବା ବେଳେ ଦୁର୍ଘଟଣାଗ୍ରସ୍ତ ଗାଡିର ଚାଳକ ମଧ୍ୟ ସେଠାରୁ ଚମ୍ପଟ ମାରିଥିଲା। ଘଟଣାସ୍ଥଳରେ ପୁରୀ ଜିଲା ଡେଲାଙ୍ଗର ଅଭିନାଶ ପ୍ରଧାନ(୩୫), ମାଟିଆ ପଡାର ବଳରାମ ସାହୁ(୩୦) ଜଣଙ୍କର ମୃତ୍ୟୁ ହୋଇଥିଲା। ଆହତଙ୍କ ମଧ୍ୟରୁ କେତେକଙ୍କୁ କଟକ ଏସସିବି ପଠାଯାଇଥିବା ବେଳେ ଅନ୍ୟ କେତେକଙ୍କୁ ଭୁବନେଶ୍ବର କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। କ୍ୟାପିଟାଲ ହସ୍ପିଟାଲରେ ଚିକିତ୍ସାଧୀନ ଥିବା ଅବସ୍ଥାରେ ମୃତକ ଅଭିନାଶ ପ୍ରଧାନ(୩୫)ଙ୍କ ୪ ବର୍ଷୀୟ ପୁଅ ଆୟୁଷ ପ୍ରଧାନ ଆଜି ଆଖି ବୁଜିଛି। ମୃତକ ଅଭିନାଶ ପ୍ରଧାନଙ୍କ ସ୍ତ୍ରୀ କନକ ପ୍ରଧାନ ଆହତ ଅବସ୍ଥାରେ ଚିକିତ୍ସାଧୀନ ରହିଛନ୍ତି। ମୃତକ ବଳରାମ ସାହୁଙ୍କ ସ୍ତ୍ରୀ ବୀଣା ସାହୁ ଓ ପୁଅ କାହ୍ନା ସାହୁଙ୍କ ଚିକିତ୍ସା ମଧ୍ୟ ଜାରି ରହିଛି। ଏପର୍ଯ୍ୟନ୍ତ ଅନ୍ୟ ଆହତଙ୍କ ପରିଚୟ ମିଳିପାରିନାହିଁ।
