ଜାମ୍ମୁ: ନିୟନ୍ତ୍ରଣ ରେଖାରେ ବାରମ୍ବାର ଅସ୍ତ୍ରବିରତି ଉଲ୍ଲଂଘନ କରି ଆତଙ୍କବାଦୀଙ୍କୁ ଭାରତୀୟ ସୀମାରେ ପ୍ରବେଶ କରାଇବାର ଉଦ୍ୟମ ପାକ୍ ସେନାକୁ ମହଙ୍ଗା ପଡ଼ିଛି। ଭାରତୀୟ ଯବାନଙ୍କ ଦୃଢ଼ ଜବାବ ଫଳରେ ୧୦ ପାକ୍ ସୈନ୍ୟ ନିହତ ହୋଇଛନ୍ତି। ପୁଞ୍ଚ ଜିଲାର କୃଷ୍ଣା ଘାଟି ଏବଂ ମନକୋଟରେ ଭାରତୀୟ ଯବାନଙ୍କ ଗୁଳିରେ ଏମାନଙ୍କ ମୃତ୍ୟୁ ଘଟିଛି। ଶୁକ୍ରବାର ସୁଦ୍ଧା ମୃତ୍ୟୁ ସଂଖ୍ୟା ୬ ଥିବା ଜଣାପଡ଼ିଥିଲା। ଶନିବାର ଏହି ସଂଖ୍ୟା ୧୦ରେ ପହଞ୍ଚିଥିବା ସୂଚନା ମିଳିଛି। ଏହା ସହିତ ପିଓକେର ବଟ୍ଟଲ ଅଞ୍ଚଳରେ ଥିବା ପାକ୍ ସେନାର ୨ଟି ଶିବିର ଧ୍ଵଂସ ହୋଇଯାଇଛି। ପାକ୍ ସୈନ୍ୟଙ୍କ ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି କୁହାଯାଉଛି।
ଏହା ପୂର୍ବରୁ ଗୁରୁବାର ମଧ୍ୟ ଉରି ସେକ୍ଟରରେ ଭାରତୀୟ ଯବାନଙ୍କ ଆକ୍ରମଣ ଫଳରେ ୨ ପାକ୍ ସୈନ୍ୟ ନିହତ ହୋଇଥିଲେ। ପାକିସ୍ତାନର ଅସ୍ତ୍ରବିରତି ଉଲ୍ଲଂଘନ ଯୋଗୁ ଜଣେ ଭାରତୀୟ ଯବାନ ଶହୀଦ ହେବା ସହିତ ଜଣେ ନାଗରିକ ପ୍ରାଣ ହରାଇଥିଲେ। ଏହାର କଡ଼ା ଜବାବରେ ୨ ପାକ୍ ସୈନ୍ୟଙ୍କୁ ଜୀବନ ହରାଇବାକୁ ପଡ଼ିଥିଲା। ଏହି ଦୁଇଟି ଘଟଣା ପରେ ବଟ୍ଟଲ ଅଞ୍ଚଳରେ ଲୋକମାନଙ୍କୁ ଘର ଭିତରେ ରହିବାକୁ ପାକ୍ ସେନା ପକ୍ଷରୁ ନିର୍ଦେଶ ଦିଆଯାଇଛି।
ବାରମ୍ବାର ଅସ୍ତ୍ରବିରତି ଉଲ୍ଲଂଘନ ସାଙ୍ଗକୁ ଭାରତୀୟ ସେନାର କଡ଼ା ଜବାବ ଫଳରେ ସୀମାରେ ଉତ୍ତେଜନା ବଢ଼ିବାରେ ଲାଗିଛି। ଦୁଇ ଦେଶର ଯବାନ ଛକାପଞ୍ଝା ଅବସ୍ଥାରେ ରହିଛନ୍ତି। ଏକକାଳୀନ ୧୦ ଯବାନ ନିହତ ହେବା ପରେ ପାକିସ୍ତାନ ପଟୁ ରଜୌରୀ ଏବଂ ନୌସେରା ସେକ୍ଟରରେ ଗୁଳିମାଡ଼ କରାଯାଇଛି। କଲାଲ ଏବଂ ଡିଙ୍ଗ ଅଞ୍ଚଳରେ ବି ପାକ୍ ପକ୍ଷରୁ ଗୁଳିମାଡ଼ ହୋଇଛି। ଫଳରେ ଡିଙ୍ଗ ଅଞ୍ଚଳରେ ଗ୍ରାଫ୍ ବିଭାଗର ବାରାକ ଏବଂ କିଛି ଯନ୍ତ୍ରପାତି କ୍ଷତିଗ୍ରସ୍ତ ହୋଇଛି। ସେଠାରେ କାର୍ଯ୍ୟରତ ଚୌକିଦାର ଏବଂ ଅନ୍ୟମାନେ ନିକଟରେ ନିର୍ମିତ ବଙ୍କରରେ ଲୁଚି ନିଜର ଜୀବନ ବଞ୍ଚାଇଛନ୍ତି।
