ନୂଆଦିଲ୍ଲୀ: ବିଜେପିର ପୂର୍ବତନ ସାଂସଦ ସ୍ବାମୀ ଚିନ୍ମୟାନନ୍ଦଙ୍କ ବିରୋଧରେ ବଳାତ୍କାର ଅଭିଯୋଗ ଆସିବା ପରେ କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ଉତ୍ତର ପ୍ରଦେଶରେ ମହିଳାଙ୍କ ସୁରକ୍ଷା ନେଇ ପ୍ରଶ୍ନ ଉଠାଇଛନ୍ତି। ଏହା ସହିତ ଚିନ୍ମୟାନନ୍ଦ ବିଜେପି ନେତା ହୋଇଥିବାରୁ ପୁଲିସ ଚୁପ୍ ରହିଛି କି ବୋଲି ପ୍ରିୟଙ୍କା ପ୍ରଶ୍ନ କରିଛନ୍ତି।
ପ୍ରିୟଙ୍କା ଟ୍ବିଟ୍ କରି କହିଛନ୍ତି, ଉତ୍ତର ପ୍ରଦେଶର ବିଜେପି ସରକାର ନିଜର କାର୍ଯ୍ୟକଳାପରୁ ସ୍ପଷ୍ଟ କରିଦେଇଛି ଯେ ମହିଳା ସୁରକ୍ଷା ଉପରେ ତାହାର କୌଣସି ଧ୍ୟନ ନାହିଁ। ଚିନ୍ମୟାନନ୍ଦଙ୍କ ବିରୋଧରେ ଅଭିଯୋଗ କରିଥିବା ଛାତ୍ରୀ ସୁରକ୍ଷା ପାଇଁ ୨ୟ ଥର ଲାଗି ଗଣମାଧ୍ୟମରେ ନିବେଦନ କରିବାକୁ ପଡ଼ିଛି। ପ୍ରକୃତରେ ଉତ୍ତର ପ୍ରଦେଶ ପୁଲିସ କ’ଣ ପାଇଁ ଚୁପ୍ ରହିଛି ? କାରଣ ଅଭିଯୁକ୍ତଙ୍କ ସମ୍ପର୍କ ବିଜେପି ସହ ଅଛି ବୋଲି କି ସେ ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ, ଉତ୍ତର ପ୍ରଦେଶର ଜଣେ ଛାତ୍ରୀ ଚିନ୍ମୟାନନ୍ଦଙ୍କ ବିରୋଧରେ ବଳାତ୍କାର ଅଭିଯୋଗ କରିଛନ୍ତି। ସେ ଅନେକ ଥର ଅଭିଯୋଗ କରିଥିଲେ ମଧ୍ୟ ଉତ୍ତର ପ୍ରଦେଶ ପୁଲିସ ପ୍ରାଥମିକ ଏତଲା ରୁଜୁ କରି ନ ଥିବାବେଳେ ଅଭିଯୁକ୍ତକୁ ମଧ୍ୟ ପଚରାଉଚରା କରିନାହିଁ।
