ଶ୍ରୀନଗର: କାଶ୍ମୀର ଘାଟିରେ ଗୁରୁବାର ଭିନ୍ନ ଭିନ୍ନ ସ୍ଥାନରେ ୩ଟି ଏନକାଉଣ୍ଟର ଘଟିଛି। ଯବାନ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ ଯୋଗୁ ୬ଜଣ ଆତଙ୍କବାଦୀ ନିହତ ହୋଇଛନ୍ତି। ଏହା ସହ ଜଣେ ଯବାନ ଶହୀଦ ହୋଇଛନ୍ତି। ନିହତ ଅତାଙ୍କୀଙ୍କ ମଧ୍ୟରେ ଜଣେ ଜୈଶ ସଂଗଠନର କମାଣ୍ଡର ରହିଛି। ସେ ଲେଥପୋରାରେ ସିଆରପିଏଫ କ୍ୟାମ୍ପରେ ହୋଇଥିବା ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଥିଲା।
ଗୁରୁବାର ପ୍ରଥମେ ଦକ୍ଷିଣ କାଶ୍ମୀରର ପୁଲୱାମା ଜିଲା ଅନ୍ତର୍ଗତ ଡାଲିପୋରା ଗାଁରେ ଏନକାଉଣ୍ଟର ହୋଇଥିଲା। ଗାଁରେ ଆତଙ୍କବାଦୀ ଲୁଚି ରହିଥିବା ଖବର ମିଳିବା ପରେ ଅପରାହ୍ନ ୩ଟାରେ ସେନାର ୫୫ ରାଷ୍ଟ୍ରୀୟ ରାଇଫଲ୍ସ, ସିଆରପିଏଫ ଏବଂ ଏସଓଜି ଯବାନଙ୍କ ପକ୍ଷରୁ ସର୍ଚ୍ଚ ଅପରେଶନ ଆରମ୍ଭ ହୋଇଥିଲା। ଏହି ସମୟରେ ଯବାନ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ ଘଟିଥିଲା। ଏଥିରେ ହରିୟାଣାର ଜଣେ ଯବାନ ସନ୍ଦୀପ ଶହୀଦ ହୋଇଥିଲେ ଏବଂ ଅନ୍ୟ ୨ ଜଣ ଆହତ ହୋଇଥିଲେ। ପରେ ଆତଙ୍କବାଦୀଙ୍କୁ କଡ଼ା ଜବାବ ଦିଆଯାଇଥିଲା ଏବଂ ଯବାନଙ୍କ ଗୁଳିରେ ୩ ଆତଙ୍କୀ ନିହତ ହୋଇଥିଲେ। ସେମାନଙ୍କ ନାମ ହେଉଛି ପୁଲୱାମାର ନସୀର ପଣ୍ଡିତ, ସୋପିଆନର ଉମର ମୀର ଏବଂ ପାକିସ୍ତାନର ଖାଲିଦ। ଖାଲିଦ ଲେଥପୋରାରେ ହୋଇଥିବା ସିଆରପିଏଫ କ୍ୟାମ୍ପ ଆକ୍ରମଣର ମାଷ୍ଟରମାଇଣ୍ଡ ଥିଲା।
ସେହିପରି ସୋପିଆନ ଜିଲାର ହଣ୍ଡେୱ ଗାଁରେ ଯବାନ ଏବଂ ଆତଙ୍କବାଦୀମାନେ ମୁହାଁମୁହିଁ ହୋଇଥିଲେ। ଉଭୟ ପକ୍ଷ ମଧ୍ୟରେ ଗୁଳିବିନିମୟ ଘଟିଥିଲା। ଏଥିରେ ମଧ୍ୟ ୩ ଆତଙ୍କୀ ନିହତ ହୋଇଥିଲେ। ଏହାବ୍ୟତୀତ କୁପୱାଡାରେ ଗୁଳିବିନିମୟ ବେଳେ ଆତଙ୍କବାଦୀମାନେ ଖସି ପଳାଇବାରେ ସକ୍ଷମ ହୋଇଥିଲେ।
