ଭୁବନେଶ୍ବର: ଲକ୍ଡ଼ାଉନ ୪ର୍ଥ ପର୍ଯ୍ୟାୟ ଶେଷ ପରେ ଆରମ୍ଭ ହୋଇଥିବା ଅନଲକ-୧.୦ ଗତ ୧ ତାରିଖଠାରୁ ଆରମ୍ଭ ହୋଇଛି। କେନ୍ଦ୍ର ସରକାରଙ୍କ ନିର୍ଦେଶକ୍ରମେ ଜୁନ୍ ୮ ତାରିଖରୁ କୋହଳ ଆଉଟିକିଏ କୋହଳ କରାଯାଉଛି ଏବଂ ଏହିକ୍ରମରେ ରାଜ୍ୟଭିତରେ ଆସନ୍ତାକାଲିଠାରୁ ୬ଟି ସ୍ବତନ୍ତ୍ର ଟ୍ରେନ୍ ଓ ରାଜ୍ୟ ପରିବହନ ନିଗମର ୯୬ ବସ୍ ଚଳାଚଳ କରିବ ।
ଭୁବନେଶ୍ୱରରୁ ବଲାଙ୍ଗିର, ଭଦ୍ରକ, ବ୍ରହ୍ମପୁର, କୋରାପୁଟ ଓ ରାଉରକେଲାକୁ ଏବଂ ସମ୍ବଲପୁରରୁ ଖୋର୍ଦ୍ଧା ରୋଡ୍ ଷ୍ଟେସନ୍ ମଧ୍ୟରେ ଏହି ୬ଟି ସ୍ୱତନ୍ତ୍ର ଟ୍ରେନ୍ ଚାଲିବ ବୋଲି ସୂଚନା ମିଳିଛି । ସେହିପରି ଭୁବନେଶ୍ୱର-କୋରାପୁଟ ସ୍ବତନ୍ତ୍ର ଟ୍ରେନ୍ ସମ୍ବଲପୁର, ଟିଟିଲାଗଡ଼ ଓ ରାୟଗଡ଼ା ଦେଇ ଚଳାଚଳ କରିବ। ଏହି ଟ୍ରେନଟି ସପ୍ତାହକୁ ୩ ଦିନ ଚଳାଚଳ କରିବ। ଅନ୍ୟ ୫ଟି ସ୍ପେଶାଲ୍ ଟ୍ରେନ୍ କେବଳ ଶନିବାର ଓ ରବିବାରକୁ ଛାଡ଼ି ଅନ୍ୟ ୫ ଦିନ ଯିବା ଆସିବା କରିବ। ଏହି ଟ୍ରେନ୍ ନିମନ୍ତେ ସ୍ଥାନୀୟ ଟିକେଟ୍ ସଂରକ୍ଷିତ କାଉଣ୍ଟର, ଆଇଆରସିଟିସି ୱେବସାଇଟରୁ ମିଳିବ ଏବଂ କେବଳ କନଫର୍ମ ଟିକେଟ ଥିଲେ ଯାତ୍ରା ନିମନ୍ତେ ଅନୁମତି ମିଳିବ ।
ଅନ୍ୟପକ୍ଷରେ ରାଜ୍ୟରେ ୬୬ଟି ରୁଟରେ ବସ୍ ଚଳାଚଳ କରିବ । ରାଜଧାନୀ ଭୁବନେଶ୍ବରରୁ ୨୨ଟି ସହରକୁ ଗାଡ଼ି ଯାତାୟତ କରିବ । ବସରେ ଯେତିକି ସିଟ୍ ସେତିକି ଯାତ୍ରୀ ଯିବେ । କୌଣସି ଯାତ୍ରୀଙ୍କୁ ଠିଆ କରି ନେବା ପାଇଁ ଅନୁମତି ନାହିଁ ।
