ସାଙ୍ଗ ହେଇ ପଢୁଥିଲେ, ସାଙ୍ଗ ହେଇ ଖେଳୁଥିଲେ । ଶେଷରେ ସାଙ୍ଗ ହୋଇ ଗୋଟିଏ ଶ୍ମଶାନରେ ଜଳିଗଲେ । ଗୋଟିଏ ସ୍କୁଲ ଓ ଗୋଟିଏ ଗାଁର ୧୨ ଜଣ ଛାତ୍ରଛାତ୍ରୀ ଏକା ସାଙ୍ଗରେ ଚାଲିଗଲେ ଆରପାରିକୁ । ସେମାନଙ୍କ ଶେଷ ଯାତ୍ରର ଦୃଶ୍ୟ ଥିଲା ଯେତିକ ଦୁଃଖଦ ସେତିକି ହୃଦୟ ବିଦାରକ । ୪ ରୁ ୧୨ ବର୍ଷ ବୟସ୍କ ଏହି ପିଲାମାନଙ୍କ ଅନ୍ତିମ ବିଦାୟରେ ଗାଁର ଆଖପାଖ ଅଞ୍ଚଳରୁ ପ୍ରାୟ ହଜାର ହଜାର ଲୋକେ ସାମିଲ ହୋଇଥିଲେ । ସ୍ଥାନୀୟ ଅଞ୍ଚଳରେ ଦୋକାନ ବଜାର ବନ୍ଦ ରହିଥିଲା । ସମସ୍ତଙ୍କ ମନ ଯେପରି ଶୋକର ବାଦଲ ଯେପରି ଢାଙ୍କି ରହିଥିଲା ।
ଏଭଳି ଲୋକଟାଙ୍କୁରା ଦୃଶ୍ୟ ହିମାଚଳ ପ୍ରଦେଶର ଖୁଓ୍ଵାରା ଗାଁରେ ଗତକାଲି ଦେଖିବାକୁ ମିଲିଥିଲା । ହିମାଚଳ ପ୍ରଦେଶରେ ଏକ ସ୍କୁଲ ବସ୍ ଭାରସାମ୍ୟ ହରାଇ ୨୦୦ ଫୁଟ୍ ତଳକୁ ଏକ ଘାଇରେ ଖସିପଡ଼ିବାରୁ ୩୦ ଜଣଙ୍କର ମୃତ୍ୟୁ ଘଟିଥିଲା । ସେମାନଙ୍କ ମଧ୍ୟରୁ ୨୭ ଜଣ ସ୍କୁଲ ଛାତ୍ରଛାତ୍ରୀ ଥିଲେ । ଏହି ଭୟାନକ ଦୁର୍ଘଟଣାରେ କେବଳ ଖୁଓ୍ଵାରା ଗାଁ ୧୨ ଜଣ ପିଲାଙ୍କୁ ହରାଇଛି । ମଙ୍ଗଳବାର ଦିନ ଏମାନଙ୍କୁ ଏକାଠି ଗୋଟିଏ ଶ୍ମଶାନରେ ଦାହ କରାଯାଇଥିଲା । ଶ୍ମଶାନରେ ପିଲାମାନଙ୍କର ସ୍କୁଲ ଡ୍ରେସ ଓ ବ୍ୟାଗ୍ ପଡିଥିବାର ଦେଖିବାକୁ ମିଳିଥିଲା।
