ମାଲକାନଗିରି: ନକ୍ସଲ ପ୍ରଭାବିତ ବିଜାପୁର ଜିଲ୍ଲାରେ ୧୦୩ ଜଣ ମାଓବାଦୀ ଅସ୍ତ୍ରଶସ୍ତ୍ର ଛାଡ଼ି ସମାଜର ମୁଖ୍ୟ ସ୍ରୋତକୁ ଫେରିବାକୁ ନିଷ୍ପତ୍ତି ନେଇଛନ୍ତି। ସେମାନେ ଗୁରୁବାର ଆତ୍ମସମର୍ପଣ କରିଛନ୍ତି। ସେମାନଙ୍କ ମଧ୍ୟରୁ ୪୯ ଜଣ ମାଓବାଦୀଙ୍କ ଉପରେ ମୋଟ ୧ କୋଟି ୦୬ ଲକ୍ଷ ୩୦ ହଜାର ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିଲା।
ଆତ୍ମସମର୍ପଣ କରିଥିବା ମାଓବାଦୀମାନଙ୍କ ମଧ୍ୟରେ ଜଣେ ଡିଭିସିଏମ୍, ଚାରିଜଣ ପିପିସିଏମ୍, ଚାରିଜଣ ଏସିଏମ୍, ପାଞ୍ଚଜଣ ଏରିଆ କମିଟି ସଦସ୍ୟ, ପାଞ୍ଚଜଣ ମିଲିସିଆ କମାଣ୍ଡର/ଡେପୁଟି କମାଣ୍ଡର, ଚାରିଜଣ ଜନତାନା ସରକାର ଅଧ୍ୟକ୍ଷ, ୨୨ ଜଣ ଜନତାନା ସରକାର ସଦସ୍ୟ, ୨୩ ଜଣ ମିଲିସିଆ ପ୍ଲାଟୁନ ସଦସ୍ୟଙ୍କ ସମେତ ବିଭିନ୍ନ ପଦବୀରେ ସକ୍ରିୟ ଥିବା ମାଓବାଦୀମାନେ ସାମିଲ ଅଛନ୍ତି।
ଆତ୍ମସମର୍ପଣ କରିଥିବା ନକ୍ସଲମାନେ କହିଛନ୍ତି ଯେ ସଂଗଠନର ବିଚାରଧାରାରୁ ମୋହଭଙ୍ଗ, ଲଗାତାର ନେତୃତ୍ୱର ଅଭାବ, ସୁରକ୍ଷା ବାହିନୀର ଚାପପୂର୍ଣ୍ଣ କାର୍ଯ୍ୟାନୁଷ୍ଠାନ ଏବଂ ସରକାରଙ୍କ ପୁନର୍ବାସ ନୀତି ସେମାନଙ୍କୁ ଏହି ପଦକ୍ଷେପ ନେବାକୁ ପ୍ରେରିତ କରିଛି। ଆତ୍ମସମର୍ପିତ ମାଓବାଦୀମାନଙ୍କୁ ୫୦-୫୦ ହଜାର ଟଙ୍କାର ଚେକ୍ ପ୍ରଦାନ କରାଯାଇଛି।
ଏହି ଆତ୍ମସମର୍ପଣ ବିଜାପୁରରେ ଦାନ୍ତେୱାଡ଼ା ରେଞ୍ଜର ଉପ-ପୁଲିସ ମହାନିରୀକ୍ଷକ କମଲୋଚନ କଶ୍ୟପ, କେରିପୁ ସେକ୍ଟରର ଡିଆଇଜି ବିଏସ୍ ନେଗୀ, ଏସ୍ପି ବିଜାପୁର ଡ. ଜିତେନ୍ଦ୍ର କୁମାର ଯାଦବ, କୋବ୍ରା ଏବଂ କେରିପୁ ବାଟାଲିୟନର କମାଣ୍ଡେଣ୍ଟ, ଏସ୍ଟିଏଫ୍ ଓ ଡିଆର୍ଜିର ବରିଷ୍ଠ ଅଧିକାରୀ ତଥା ଅନ୍ୟାନ୍ୟ ପୁଲିସ ଅଧିକାରୀଙ୍କ ଉପସ୍ଥିତିରେ ହୋଇଛି।
ତଥ୍ୟ ଅନୁଯାୟୀ, ୨୦୨୫ ଜାନୁଆରୀ ୧ରୁ ଏପର୍ଯ୍ୟନ୍ତ ୪୨୧ ଜଣ ମାଓବାଦୀ ଗିରଫ ହୋଇଥିବା ବେଳେ ୪୧୦ ଜଣ ଆତ୍ମସମର୍ପଣ କରିଛନ୍ତି ଏବଂ ୧୩୭ ଜଣ ନିହତ ହୋଇଛନ୍ତି। ସେହିପରି, ୨୦୨୪ ଜାନୁଆରୀ ୧ରୁ ଏପର୍ଯ୍ୟନ୍ତ ୯୨୪ ଗିରଫଦାରୀ, ୫୯୯ ଆତ୍ମସମର୍ପଣ ଏବଂ ୧୯୫ ମାଓବାଦୀ ଏନକାଉଣ୍ଟରରେ ମୃତ୍ୟୁବରଣ କରିଛନ୍ତି।
