ଗୋପାଳପୁର: ଚମାଖଣ୍ଡି ଥାନା ଅନ୍ତର୍ଗତ ବନ୍ଦର ଗାଁରେ ବୁଧବାର ଅପରାହ୍ନରେ ଏକ ନିର୍ମାଣାଧୀନ ହାଚେରୀର ପାଚେରି ଭୁଶୁଡ଼ି ପଡିଵାରୁ ଜଣେ ମହିଳା ଶ୍ରମିକଙ୍କ ମୃତ୍ୟୁ ଘଟିଛି। ଅନ୍ୟ ୩ ଜଣ ଆହତ ହୋଇଛନ୍ତି। ପାଚେରି ନିର୍ମାଣ କାର୍ଯ୍ୟରେ ଶ୍ରମିକମାନେ ନିୟୋଜିତ ହୋଇଥିଲେ। କାମ ଚାଲିଥିବାବେଳେ ହଠାତ୍ ନିର୍ମାଣାଧୀନ ପାଚେରି ଭୁଶୁଡ଼ି ପଡ଼ିଥିଲା। ଫଳରେ ୫ ମହିଳା ଶ୍ରମିକ ପାଚେରି ଭଗ୍ନାବଶେଷ ତଳେ ଚାପି ହୋଇଯାଇଥିଲେ। ଅନ୍ୟ ଶ୍ରମିକମାନେ ସେମାନଙ୍କୁ ଉଦ୍ଧାର କରି ଡାକ୍ତରଖାନା ପଠାଇଥିଲେ। ବନ୍ଦର ଗାଁର ଇ. ପାର୍ଵତୀଙ୍କ ଅବସ୍ଥା ଗୁରୁତର ରହିଥିଲା। ତାଙ୍କୁ ବ୍ରହ୍ମପୁର ବଡ଼ ମେଡିକାଲକୁ ନିଆଯାଇଥିଲା। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଆହତମାନଙ୍କୁ ଏକ ଘରୋଇ ହସ୍ପିଟାଲରେ ଚିକିତ୍ସା କରାଯାଉଛି। ମୃତା ପାର୍ବତୀଙ୍କ ୩ଟି ସନ୍ତାନ ଥିବାବେଳେ ସ୍ବାମୀ ଇ. ତାମେୟା କାମ ଅନ୍ବେଷଣରେ ଦାଦନ ଖଟିବାକୁ ଗୋଆ ଚାଲିଯାଇଛନ୍ତି। ସ୍ଵାମୀଙ୍କ ସ୍ଵଳ୍ପ ଆୟରେ ଘର ଚଳାଇବାକୁ ଅସୁବିଧା ହେଵାରୁ ପିଲାମାନଙ୍କୁ ପାର୍ବତୀ ଶଶୁ, ଶ୍ବଶୁରଙ୍କ ନିକଟରେ ଛାଡ଼ି ଶ୍ରମିକ ଭାବେ କାର୍ଯ୍ୟ କରୁଥିଲେ।
Comments are closed.