୨୩ ବର୍ଷରୁ କମ୍ ମହିଳା ଦିନିକିଆ
କଟକ : ୨୩ ବର୍ଷରୁ କମ୍ ମହିଳା ଦିନିକିଆ କ୍ରିକେଟ ଟୁର୍ଣ୍ଣାମେଣ୍ଟର ପୂର୍ବାଞ୍ଚଳ ଲିଗ୍ରେ ଓଡ଼ିଶା ୩ୟ ସ୍ଥାନ ହାସଲ କରିଛି। ଶନିବାର ତା’ର ୪ର୍ଥ ତଥା ଅନ୍ତିମ ମ୍ୟାଚ୍ରେ ୨ ରନ୍ରେ ପରାସ୍ତହେବା ପରେ ଓଡ଼ିଶା ୩ୟ ସ୍ଥାନରେ ରହିଛି। କଲକାତାରେ ଖେଳା ଯାଇଥିବା ଶନିବାର ରୋମାଞ୍ଚକର ମ୍ୟାଚ୍ରେ ଓଡ଼ିଶାକୁ ୨ ରନ୍ରେ ତ୍ରିପୁରା ପରାସ୍ତ କରିଛି। ଆର୍. ଶାହାଙ୍କ ଅର୍ଦ୍ଧଶତକ ବଳରେ ପ୍ରଥମେ ବ୍ୟାଟିଂକରି ତ୍ରିପୁରା ୪୮.୨ ଓଭରରେ ୧୩୯ ରନ୍କରି ଅଲ୍ଆଉଟ ହୋଇ ଯାଇଥିଲା। ପରେ ମଧ୍ୟକ୍ରମର ଉପଯୋଗୀ ଯୋଗଦାନ ସତ୍ତ୍ୱେ ଓଡ଼ିଶା ୫୦ ଓଭର ଶେଷରେ ୯ ୱିକେଟରେ ୧୩୭ ରନ୍ କରି ପାରିଥିଲା। ବଙ୍ଗଳା ୪ଟିଯାକ ମ୍ୟାଚ୍ ଜିତି ୧୬ ପଏଣ୍ଟ ସହ ପ୍ରଥମ ଏବଂ ତ୍ରିପୁରା ୩ଟି ମ୍ୟାଚ୍ ଜିତି ୧୨ ପଏଣ୍ଟ ସହ ୨ୟ ସ୍ଥାନରେ ରହିଛି। ୮ ପଏଣ୍ଟ ସହ ଓଡ଼ିଶା ୩ୟ ହୋଇଛି।
ଟସ୍ ଜିତି ତ୍ରିପୁରା ବ୍ୟାଟିଂ ନେବା ପରେ ବିପର୍ଯ୍ୟୟ ଭୋଗି ୮ ରନ୍ରେ ୩ଟି ଏବଂ ୪୭ ରନ୍ରେ ୪ଟି ୱିକେଟ ହରାଇଥିଲା। ପରେ ଅଧିନାୟିକା ଆର୍. ଶାହା ଓ ଆର୍. ଦେବବର୍ମା ୫ମ ୱିକେଟ ପାଇଁ ୫୬ ରନ୍ ଯୋଡ଼ିଥିଲେ। ଶାହା ୮୯ ବଲ୍ରୁ ୧୨ଟି ଚୌକା ସହ ୬୦ ଏବଂ ଦେବବର୍ମା ୬୯ ବଲ୍ରୁ ୪ଟି ଚୌକା ସହ ୩୯ ରନ୍ କରିଥିଲେ। ୩୬ ରନ୍ରେ ଓଡ଼ିଶାର ବୋଲର ତ୍ରିପୁରାର ଶେଷ ୬ଟି ୱିକେଟ ନେଇ ପାରିଥିଲେ। ରାଜଶ୍ରୀ ସ୍ୱାଇଁ ୪ଟି, ଲୁଇସା ଦାସ ୩ଟି ଓ ଅଧିନାୟିକା ସୁଶ୍ରୀ ଦିବ୍ୟଦର୍ଶିନୀ ୨ଟି ୱିକେଟ ପାଇଥିଲେ। ୧୪୦ ରନ୍ର ଲକ୍ଷ୍ୟ ଓଡ଼ିଶା ପାଇଁ ସହଜ ହେବ ବୋଲି ଆଶା କରା ଯାଉଥିଲା। ତେବେ ତ୍ରିପୁରାର ବୋଲର ନିୟମିତ ଭାବେ ୱିକେଟ ନେଇ ପାରିଥିଲେ। ସୁଶ୍ରୀ ଦିବ୍ୟଦର୍ଶିନୀ ସର୍ବାଧିକ ୨୪, ଶିଳ୍ପା ସ୍ୱାଇଁ ଅପରାଜିତ ୨୨, ଅଞ୍ଜଳି ସିଂହ ୧୮, ସୁମିତ୍ରା ସାହୁ ୧୫, ଡି. ଜାନକୀ ରେଡ୍ଡୀ ୧୦ ଓ ଲୁଇସା ଦାସ ଅପରାଜିତ ୧୧ ରନ୍ କରିଥିଲେ। ୨୧ଟି ବଲ୍ ବାକିଥାଇ ୯ଟି ୱିକେଟ ହରାଇଥିବା ବେଳେ ଓଡ଼ିଶା ୨୫ ରନ୍ ଆବଶ୍ୟକ କରୁଥିଲା। ତେବେ ଶିଳ୍ପା ସ୍ୱାଇଁ ଓ ଲୁଇସା ଦାସ ଏହି ୨୧ ବଲ୍ରୁ ୨୨ ରନ୍ କରି ପାରିଥିଲେ। ତ୍ରିପୁରାର ଆର୍. ଦେବବର୍ମା ଓ ଗଙ୍ଗାତି ତ୍ରିପୁରା ୨ଟି ଲେଖାଏଁ ୱିକେଟ ନେଇଥିଲେ।
